आर्थिक सञ्जाल चैत्र २६, २०७६ बुधबार

काठमाडौं । निक्षेप खातामा दिने ब्याजदर बैंक तथा वित्तीय संस्थाहरूले  घटाउन थालेका छन् । नेपाल बैकर्स संघमा जुटेको सहमति अनुसार वाणिज्य बैंकहरूले बचत खाता तथा मुद्दती निक्षेपमा दिने ब्याजको सीमा घटाउन शुरु गरेका हुन् । आजैमात्रै  नेपाल बैंक लिमिटेडले आगामी वैशाख १ गतेदेखि लागू हुने गरी ब्याजदर घटाएर नयाँ ब्याजदर तालिका सार्वजनिक गरेको छ ।

नेपाल बैंकले सार्वजनिक गरेको नयाँ ब्याजदर तालिका अनुसार सबैप्रकारका निक्षेपमा एक देखि डेढ प्रतिशत ब्याजदर घटाइएको छ । मुद्दती निक्षेपको अधिकतम ब्याजदर सीमा ९. २५ प्रतिशतबाट घटाएर ८. २५ प्रतिशत कायम गरिएको छ ।

त्यसमध्य संस्थागत निक्षेपको ब्याजदर ८. ५० प्रतिशतबाट घटाएर ७ प्रतिशतमा झारिएको छ । बचत तर्फ यस अघि ४ देखि ६ प्रतिशतसम्मको सीमालाई घटाएर ३ देखि ५ प्रतिशतमा झारिएको नेपाल बैंकका प्रकाशकुमार अधिकारीले जानकारी दिए ।

आधार दर घट्ने देखिएपछि  हामीले निक्षेपको ब्याजदर घटाएका हौं,’ अधिकारीले भने यो ब्याजदर आगामी वैशाख १ गतेदेखि लागू हुनेछ ।’ गत पुसको तुलनामा बैंकको आधार दर घट्ने देखिएपछि हामीले कर्जाको ब्याज दर समेत घटाउने  गरी बचत र मुद्दती दबै निक्षेप खाताको ब्याजदर घटाएको अधिकारीले जानकारी दिए ।

पुसमा ७. ८२ प्रतिशत रहेको नेपाल बैंकको आधार दर चैतमसान्तमा केही घट्ने समेत देखिएको उनले जानकारी दिए । ‘यसका साथै अहिले कर्जाको माग कम छ,’ उनले थपे ‘निक्षेप घटेको छैन ।’

नेपाल बैकर संघले केहि दिन अघि मात्रै बचत तथा मुद्दती खाताको ब्याजदर घटाउने गरी भद्रसहमति गरेको छ । सो सहमतिअनुसार बचत तथा मुद्दती खाताको ब्याजदरको माथिल्लो सीमा क्रमशः ५. ५ प्रतिशत र ८. २५ प्रतिशत कायम गरिने छ ।  सोही अनुसार बैंकहरूले धमाधम नयाँ ब्याजदर तालिका  सार्वजनिक गर्न थालेका हुन् ।

मुद्दती खातामा ८. २५ प्रतिशत सीमा तोके पनि शाखा प्रबन्धकले ०. ५० ( आधा ) प्रतिशतसम्म ब्याजदर बढाउन सक्ने व्यवस्थालाई यथावत राखिएको छ । यसो हुँदा अब वाणिज्य बैंकमा निक्षेप राख्दा अधिकतम ८.७५ प्रतिशत भन्दा बढी ब्याज पाइने छैन ।

वाणिज्य बैंकहरूले ब्याजदर घटाएसँगै विकास बैंक तथा वित्त कम्पनीहरूको ब्याजदर समेत घटने सम्भावना रहेको छ । विकास बैंक तथा वित्त कम्पनीहरूले अहिले वाणिज्य बैंकहरू कै ब्याजदरलाई सन्दर्भ दर मानेर आफ्नो क्षेत्रको ब्याजदर निर्धारण गर्दै आएका छन् ।

नेपाल बैंकले तेस्रो त्रैमासपछि कर्जाको ब्याजदर समेत समायोजन गर्ने गरी नयाँ ब्याज दर कायम गर्न लागेको हो । बैंकले वैशाखको आधार दर अनुरुप २०७७ जेठ पहिलो सातादेखि स्वदेशी मुद्राको कर्जाको ब्याजदर घटाउने बताएको छ ।