काठमाडौँ ।  त्रिभुवन विश्वविद्यालय (त्रिवि) मा परीक्षाफल प्रकाशन लगायतका काममा व्यापक ढिलासुस्ती हुने गरेको पाइएको छ । त्रिविको ढिलासुस्तीका कारण एक वर्षभन्दा बढी समयदेखि विद्यार्थीले नतिजा कुर्न बाध्य भएका छन् ।

सामान्यतया तीन महिनासम्म परीक्षाफल प्रकाशन गर्नुपर्नेमा त्रिविले एक वर्ष बिती सक्दा समेत परीक्षाफल प्रकाशन गरेको छैन । त्रिविले समयमा नै परीक्षाफल प्रकाशन नगर्दा विद्यार्थीको ‘करिअर’मा नै असर पर्ने गरेको समेत पाइएको छ ।

शैक्षिक प्रमाणपत्र लिएर आफ्नो करिअरको बाटो तय गर्ने सपना बोकेका युवा विद्यार्थीमाथि त्रिविको ढिलासुस्तीले तनाव दिने गरेको विद्यार्थीहरूको गुनासो रहेको पाइन्छ ।

स्नातक तह दोस्रो वर्षको परीक्षा गत वैशाख २०७८ मा भएको थियो । तर हालसम्म पनि त्रिविले सो परीक्षाको परीक्षाफल प्रकाशित गरेको छैन । स्नातक तहतर्फको प्रायः सबै सङ्कायको परीक्षाफल लामो समयदेखि प्रकाशन नभएको पाइएको छ ।

त्रिविका स्नातक तह, स्नातकोत्तर तहका विभिन्न सङ्कायको नतिजा प्रकाशनमा ढिला हुने गरेको छ । वार्षिक प्रणालीमा मात्र नभएर सेमेस्टर प्रणालीमा समेत परीक्षाफल ढिला हुने गरेको विद्यार्थीको गुनासो छ ।

गत साउनरभदौमा डिन कार्यालयले लिएको सामाजिक शास्त्र, अर्थशास्त्रलगायत विषयको नतिजा हालसम्म पनि प्रकाशन हुन सकेको छैन । अन्य सङ्काय र तहको परीक्षाफल प्रकाशनमा समेत ढिलाइ हुने गरेको पाइएको छ ।

त्रिविले जनशक्तिको अभावका कारण समयमा नै नतिजा प्रकाशन गर्न नसकेको जवाफ दिएको छ । त्रिविले लामो समयदेखि जनशक्तिको अभावमा देखाएर परीक्षाफल प्रकाशनमा ढिलासुस्ती गर्ने गरेको पाइएको छ ।