आर्थिक सञ्जाल मंगलबार, २० फागुन २०७६

काठमाडौं । नेपालको निजी अन्तर्राष्ट्रिय एअरलाइन्स् हिमालय एअरलाइन्सले पाचौं वार्षिकोत्सवको अवसरमा अर्काे नयाँ ए ३१९–११५ विमान थप गरेको घोषणा गरेको छ । क्यापटेन हाओ दीले चीनको तियानजिन बिन्हाई अन्तर्राष्ट्रिय विमानस्थलबाट नेपालको शुक्रबार काठमाडौं स्थित त्रिभुवन अन्तर्राष्ट्रिय विमानस्थलमा भित्र्याएका हुन् ।

धेरै पर्खाईमा रहेको नयाँ विमान एमएसएन ९०२०,दर्ता नम्बर ९ एन–एजेके, स्थानीय समय २२ः२० मा विमानस्थलमा अवतरण भयो । यो नयाँ विमानको प्रवेशसँगै हिमालय एअरलाइन्स्सँग तिन एअरबस ए३२०–२१४ र एक एअरबस ए३१९–११५ गरी चारवटा विमान हुनेभएको छ ।

हालै समावेश गरिएको एअरबस ए३१९–११५ छोटो देखि मध्यम दूरीको उडान भर्ने एअरबस ए–३२० परिवारकै विमान हो । एअरबस कम्पनीद्वारा निर्मित यो विमान न्यारो–बडी, दुई इन्जीनयुक्त जेट विमान हो जस्ले व्यावसायिक यात्रीहरुलाई ल्याउने लाने गर्छ ।

कूल आठ बिजनेस क्लास सिट र १२० इकोनोमी क्लास सिट क्षमता रहेको विमानमा नयाँ र कुशल इन्जीन क्षमता रहेको छ जुन १५ प्रतिशतसम्म इन्धन बचत गर्न सक्षम छ । हालै समावेश गरिएको यस विमानले उच्च स्थानमा रहेका तिब्बतका ल्हासा, अलिजस्ता गन्तव्यस्थलहरुमा उडान गर्ने तथा उडान संख्या बढाउंदै धेरैभन्दा धेरै यात्रुलाई सहज र सरलरुपमा सेवा प्रदान गर्नेछ । यो नयाँ विमान ए ३१९ थप गरेसँगै एअरलाइन्स्ले मध्यपूर्वी मुलुक र चीनमा आफ्नो बजार विस्तार समृद्ध बनाउने योजना रहेको कम्पनीले जनाएको छ ।

एअरलाइन्स्का अध्यक्ष झोउ इन्योङले सन् २०२० मा हिमालय एअरलाइन्सको सञ्जाल विस्तार र नयाँ रुटहरु सञ्चालन गर्ने एअरलाइन्स्को रणनीति अनुरुप नयाँ विमान थप गरेको बताए । विमान थप गर्ने योजना अन्तर्गत सन् २०२१ सम्म ए ३१९ का दुईवटा विमान थप गरिने उनले बताउ ।

प्रशासनका उपाध्यक्ष विजय श्रेष्ठले हिमालय एअरलाइन्स्मा ए३१९ को प्रवेश, संस्थाको विमान थप गर्ने योजनामा एउटा कोसेढुंगा भएको बताए । हिमालय एअरलाइन्सले सन् २०१६ मे ३१ बाट ए३२०–११४ सिरिजको १५८ सिट भएको विमानका साथ दोहा उडान गरेर आफ्नो हवाई यात्रा सुरु गरेको थियो । चार वर्षभन्दा अन्तरालमै एअरलाइन्सले ६ वटा देशका १० वटा गन्तव्य स्थलमा आफ्नो सञ्जाल स्थापित गरिसकेको जनाएको छ ।

एअरलाइन्सले आफ्नो अन्तर्राष्ट्रिय सञ्जालमा दोहा, दमाम, ढाका, क्वालालम्पुर, आबुधाबी र चीनको चाङसा, गुईयाङ, सेनजेन, बेइजिङ र चोङकिङमा उडान भर्दै आइरहेको छ ।