अमेरिकी राष्ट्रपति डोनाल्ड ट्रम्पले युद्ध अन्त्य गर्न अमेरिकाले अगाडि सारेका प्रस्तावबारे इरानले दिएको प्रतिक्रिया पूर्णतः अस्वीकार्य भएको बताएपछि अन्तर्राष्ट्रिय बजारमा तेलको भाउ बढेको छ ।

इरानले पाकिस्तानमार्फत अमेरिकालाई पठाएको जवाफमा द्वन्द्व तत्काल अन्त्य गर्न आह्वानसहित अमेरिका र इजरायलले इरानमाथि थप आक्रमण नगर्ने सुनिश्चितिता खोजेको इरानको समाचार संस्था तस्निमले जनाएको छ ।

यस्तै इरानले लडाइँबाट खेप्नुपरेको हानिको इरानले क्षतिपूर्ति पाउनुपर्ने र हर्मुजमा इरानको सार्वभौम अधिकार कायम हुनुपर्ने माग गरेको छ ।

योसँगै एशियाको बजारमा ब्रेन्ट कच्चा तेलको मूल्य प्रतिब्यारेल ४ दशमलव १ प्रतिशतले बढेर १०५ डलर प्रतिब्यारल पुग्यो । गएको २८ फेब्रुअरीमा युद्ध शुरू भएपछि हर्मुज जलमार्ग अवरुद्ध भएको छ ।

हर्मुज जलमार्गबाट पानीजहाजमार्फत विश्वका विभिन्न ठाउँमा तेल र ग्यासको आपूर्ति हुन नसकेपछि अभाव र मूल्य बढेको हो । अमेरिकाले हर्मुज जलमार्गमा पानीजहाजको आवतजावत खोल्ने र इरानले परमाणु पदार्थ प्रशोधन गर्ने काम स्थगित गर्नुपर्ने शर्तसहित १४ बुँदे प्रस्ताव गरेको थियो ।

केही दिनअघि ट्रम्पले इरान युद्ध चाँडै टुङ्गिने बताए पनि इजरायलका प्रधानमन्त्री बेन्जमिन नेतन्याहुले इरानमा  थुपारिएको  युरेनिअम  बाहिर ननिकालिएसम्म युद्ध नटुङ्गिने बताउनुभएको थियो ।

शान्तिवार्ता गर्नका लागि अप्रिल महिनाको शुरूतिर युद्धविराम घोषणा भएको थियो । केही छिटपुट घटनाबाहेक युद्धविराम पालना भएको देखिन्छ ।

इरानलाई एकीकृत प्रस्ताव प्रस्तुत गर्नका लागि समय उपलब्ध गराउन भन्दै ट्रम्पले युद्धविरामको अवधि अनिश्चितकालका लागि लम्ब्याउनुभएको थियो ।