इङ्लिस प्रिमियर लिगमा फुलह्याममाथि सहज जित निकाल्दै म्यान्चेस्टर सिटी शीर्ष स्थानमा फर्किएको छ । गएराति भएको खेलमा सिटीले घरेलु टोली फुलह्यामलाई ४–० गोल अन्तले पराजित गरेको हो ।

सिटीको जितमा जोस्को ग्वार्डियोलले २ गोल गरे । यस्तै, फिल फोडेन र जुलियन अल्भारेजले एक एक गोल थपे ।

पहिलो हाफमा १–० को अग्रता बनाएको सिटीले दोस्रो हाफमा थप ३ गोल गरेको हो । जितसँगै शीर्षस्थानमा पुगेको सिटीले ३६ खेलबाट ८५ अंक जोडेको छ । समान खेल खेलेको आर्सनल ८३ अंकसहित दोस्रो र लिभरपुल ७८ अंकसहित तेस्रो छ । पराजित फुलह्याम भने ३७ खेलबाट ४४ अंकसहित १४औँ स्थानमा छ ।

गएराति नै भएका अन्य खेलमा चेल्सीले नटिंघम फरेस्टलाई ३–२ ले हराएको छ । टोटनहम हटस्परले बर्नलीविरुद्ध २–१ को जित दर्ता गर्दा बर्नमाउथ ब्रेन्टफर्डसँग पराजित भएको छ । यस्तै क्रिष्टल प्यालेसले उल्भ्सलाई ३–१ ले हराउँदा वेष्टह्यामले लुटन टाउनलाई ३–१ ले नै हरायो ।