नेपाल भ्रमण वर्ष २०२०, सचिवालय संगको सहकार्यमा नेपाल सितोरियो कराते डो संघले प्रथम गौतम बुद्ध हिमालय अन्तर्राष्ट्रिय कराते च्याम्पियनसिप पोखरामा आयोजना गर्दैछ । नेपाल भ्रमण वर्ष २०२० को अवसरमा हुन लागेको प्रतियोगिता आगामी मार्च ५ देखि ९ तारिखसम्म हुने संयोजक राजीव थापाले जानकारी गराएका थिए । करिब ३० राष्ट्रबाट २ हजारको सहभागिता अपेक्षा गरिएको नेपाल सितोरियो कराते डो संघका अध्यक्ष दावा गुरुङले जानकारी गराउँदै सिनियर, जुनियर र भेट्रानमा गरी जम्मा २७ स्पर्धामा प्रतिस्पर्धा हुनेछ । अध्यक्ष गुरुङले भ्रमण वर्ष २०२० लाई सफल बनाउन यो प्रतियोगिताले पनि सहयोग पु¥याउने विश्वास व्यक्त गर्दै भ्रमण वर्षलाई सफल बनाउन हरेक क्षेत्रले आ–आफ्नो तर्फबाट सक्दो प्रयास गर्नु पर्ने धारणा व्यक्त गरेका छन । नेपाल भ्रमण वर्ष २०२० का सदस्य–सचिव बच्चुनारायण श्रेष्ठले खेलकुदको माध्यमबाट पनि विदेशी पर्यटकलाई नेपाल आउन आकर्षित गर्न सकिन्छ भन्ने मान्यताका साथ सो प्रतियोगितालाई सहयोग गर्न लागिएको बताएका थिए । उक्त प्रतियोगिता सञ्चालन गर्न करिब ५ करोड खर्च हुने समेत बताइएको छ ।

३ माघ २०७६, शुक्रवार २०:४६ बजे प्रकाशित