आर्थिक सञ्जाल चैत्र २४, २०७६ सोमबार

काठमाडौं ।  नेपाल पत्रकार महासंघ उपत्यका प्रदेश समितिले आज एक अपिल जारी गर्दै जनताको सूचना र समाचारको अधिकारलाइ अक्षुण्ण राख्दै आफ्नो कर्म क्षेत्रमा निरन्तर क्रियाशील पत्रकारहरुका लागि स्वास्थ्य सुरक्षासम्बन्धी सामग्री सहित तत्काल राहत प्याकेज घोषणा गर्न सरकारसंग माग गरेको छ ।

महासंघ उपत्यका प्रदेश समितिका महासचिव श्रीजन झाले जारी गर्नु भएको उक्त अपिलमा मुलुक लकडाउनको अवस्थामा रहेको संकट एवम् जोखिमपूर्ण स्थितिमा क्रियाशील सञ्चारकर्मी र सञ्चारमाध्यमको लागि विद्युत, टेलिफोन, इन्टरनेटसहितका सञ्चार सामग्रीमा छुट र अनुदानको व्यवस्था,लकडाउन अवधिमा प्रकाशन आवद्ध पत्रकारले नै सञ्चालन गरेका स्वरोजगारमुखी पत्रपत्रिकाको हकमा लोककल्याणकारी विज्ञापन, भुक्तानी पत्रकारका लागि दुर्घटना तथा स्वास्थ्य बीमा, निःशुल्क उपचारको व्यवस्था मिलाउन माग गरेको हो ।

त्यस्तै सो अपिलमा उपत्यका प्रदेश समिति कोभिड–१९ को जोखिम कारण उत्पन्न परिस्थितिमा पनि जनताको सूचना र समाचारको अधिकारलाइ अक्षुण्ण राख्दै आफ्नो कर्म क्षेत्रमा निरन्तर क्रियाशील प्रदेश समिति आवद्ध र सवै सञ्चारकर्मीमा हार्दिक कृतज्ञता व्यक्त गर्दै “आफु बाँचौँ र अरूलाई पनि बचाऊ” भन्ने मन्त्रलाई आत्मसात् गर्दै मुलकमा देखिएको संक्रमणको चुनौती पूर्ण अवस्थामा पनि आत्मविश्वास र मनोबल सहित आफ्नो कर्म क्षेत्रमा निरन्तर क्रियाशील हुुदै जनताको सूचना र समाचार प्राप्तिको हकलाइ जिवन्त राख्न पत्रकारिता जगतले दृढ इच्छाशक्ति कायम राख्दै पेशागत आचारसंहिता पालना गरी खेलेको भूमिका आफैमा स्वागतयोग्य रहेको उल्लेख गरिएको छ ।

साथै प्रदेश समितिआवद्ध एवम् सम्पूर्ण सञ्चारकर्मी साथीहरुलाई आफू सुरक्षित रही कोरोनाको संक्रमण नियन्त्रणमा सघाउ पु¥याउने गरी सचेतनामूलक सामग्री प्रवाह गर्ने आफ्नो दायित्वपूरा गर्दै सजग रहन समेत आव्हान समेत गरेको छ ।