काठमाडौँ । काठमाडौं महानगरपालिकाका प्रमुख विद्यासुन्दर शाक्यले, कोविड संक्रमणमा परेका विरामीका लागि महानगरको सहयोगका सञ्चालिन नेपाल एम्बुलेन्स सेवा १०२ निःशुल्क प्रयोग गर्न अपिल गर्नु भएको छ । शुक्रबार एक अपिल जारी गर्दै उहाँले, कोविड संक्रमण भएका कोही विरामीलाई अस्पताल जान कठिन नहोस् भनेर नेपाल एम्बुलेन्स सेवासँगको सहकार्यमा सञ्चालित अक्सिजनसहितका १० वटा एम्बुलेन्स प्रयोग गरिएको उल्लेख गर्नुभएको छ ।

कोविड विरामीका लागि यसबाट दिइने सेवा निःशुल्क हो । महानगरले कोविडबाहेकका विरामीलाई घरबाट अस्पताल, अस्पतालबाट घर र अस्पतालबाट अस्पताल जान नेपाल एम्बुलेन्स चालक संघसँगको सहकार्यमा थप १० वटा एम्बुलेन्स सञ्चालन गरेको छ ।

यी दुवै एम्बुलेन्स सञ्चालनको खर्च महानगरले उपलब्ध गराएर सेवालाई निःशुल्क गरेको छ । अपिलमा यही प्रसङ्ग उल्लेख गर्दै प्रमुख शाक्यले भन्नुभएको छ, ‘कोविडका विरामीले १०२ मा र अन्य विरामीले ११८० वा महानगरले उपलब्ध गराएका एम्बुलेन्स चालकको नं. मा सम्पर्क गरेर लिएको एम्बुलेन्स सेवाको कुनै पनि शुल्क तिर्नुपर्दैन । यदि कसैले शुल्क मागेमा महानगरको हटलाइन ११८० मा सम्पर्क गरेर जानकारी गराउनुहोला ।’

अपिलमा निःशुल्क सेवामा कसैले शुल्क मागे कारवाही गरिने व्यहोरा उल्लेख छ ।