काठमाडौं २०७६, २८ माघ । नेपाल प्रहरी महानिरीक्षको नियुक्ती मंगलवार हुने भएको छ । सोमबार बसेको मन्त्रिपरिषदको बैठकमा प्रस्ताव तयार नभएकोले आईजीपी नियुक्ती हुन सकेको थिएन् । उच्च स्रोतका अनुसार प्रधानमन्त्री केपी शर्मा ओलीले प्रहरी महानिरीक्षक (आईजीपी)मा डीआईजी ठाकुर ज्ञवालीको नाम प्रस्ताव गरेर मंगलवार बस्ने मन्त्रिपरिषद बैठकममा पेश गर्न निर्देशन दिएका छन् । उनी हाल प्रदेश १ को प्रहरी प्रमुख छन् ।
ज्ञवाली नेपाल प्रहरीमा अहिलेसम्म विवादमा नपरेका अधिकृत हुन् । यससंगै खनालपछि ज्ञवाली नेपाल प्रहरीको २७ औ महानिरीक्षक बन्ने लगभग निश्चित भएको छ । प्रधानमन्त्रीले गृहमन्त्री रामबहादुर थापालाई मंगलवार वस्ने वैठकमा ज्ञवालीको नाम पेश गर्न निर्देशन दिएको स्रोतको दावी छ ।
प्रहरी महानिरीक्षक सर्वेन्द्र खनाल सहित ३ एआईजीहरु पुष्कर कार्की, ठूले राई र धिरु बस्न्यात तथा १८ डीआईजीहरु मंगलबारबाट एकै पटक अवकास हुँदैछन् । आईजीपीका लागी ज्ञवालीका साथै दुई नम्बरमा रहेका डिआईजी तारिणीप्रसाद लम्साल प्रतिस्पर्धामा थिए । सोमबारको वैठकमा ३० वर्षे सेवा अवधी हटाउने विषयमा समेत छलफल भएको थियो ।

तर, गृह मन्त्री रामबहादुर थापा र रक्षा मन्त्री ईश्वर पोखरेलले त्यसको विरोध गरेपछि कुनै निर्णय भने हुन सकेन् ।
‘अन्तिम समयसम्म ३० वर्षे सेवा अवधी हटाउन चर्को लविङ्ग थियो, प्रहरी महानिरीक्षक नियुक्तीको प्रस्ताव सोमबार गृहले तयार नगरेकाले पनि ढिलाई भएको हो’ ।
प्रहरी महानिरीक्षक सर्वेन्द्र खनाल सहित उनका ब्याचका एआईजी र डिआईजी सेवा अवधी लम्बाउने पक्षमा रहेका थिए ।
प्रधानमन्त्री निवास बालुवाटारमा मंगलवार विहान बस्ने वैठकले प्रहरी महानिरीक्षकको टुंगो लगाउने छ । त्यसका साथै आईजिपीको प्रतिस्पर्धामा रहेका लम्साललाई एआईजीमा बढुवा गर्ने तयारी सरकारको छ ।

२८ माघ २०७६, मंगलवार ०८:५९ बजे प्रकाशित