काठमाडौं । यो साता पनि विश्व बजारमा सुनको मूल्यले उच्च रेकर्ड कायम गरेको छ । अमेरिकी डलरको मूल्यमा आएको तीब्र उतारचढावका कारण लगानीकर्ताहरु सुरक्षित लगानीतर्फ आकर्षित हुँदा सुनको भाउ बढेको विश्लेषकहरुले बताएका छन् ।

विश्व बजारमा साताको दोस्रो र चौथो दिन अर्थात, सोमबार र बुधबार सामान्य घटेको सुनको भाउ अन्य दिनहरुमा भने बढेको थियो । जेठ २५ गते, शुक्रबार अर्को भाउले नयाँ रेकर्ड राखेको छ ।

नेपाली बजारमा पनि यो साता सुनको मूल्यले नयाँ उचाई कायम गरेको छ । नेपाल सुनचाँदी व्यवसायी महासंघका अनुसार सरकारले आगामी आर्थिक वर्षको बजेट बक्तव्य मार्फत सुनको भन्सार दरमा गरेको वृद्धि साथै, विश्व बजारमा आएको प्रभावसँगै नेपाली बजारमा पनि रेकर्ड राखेको हो ।

साताको पहिलो दिन प्रति १० ग्राम १ लाख २१ हजार ७४५ रुपैयाँ रहेको सुनको भाउ शुक्रबारसम्म आइपुग्दा १ लाख २४ हजार ३१५ रुपैयाँ पुगेको छ ।

भाउ प्रति १० ग्राम २ हजार ५७० रुपैयाँ बढेको छ । प्रतितोलाको हिसाब गर्दा नेपाली बजारमा यस साता शुक्रबार १ लाख ४५ हजार रुपैयाँ पुग्यो । यो अहिलेसम्मकै उच्च मूल्य पनि हो ।

यता, नेपाली बजारमा चाँदीको मूल्य पनि बढेको छ । साताको पहिलो दिन आइतबार प्रति १० ग्राम १ हजार ५८६ रुपैयाँ रहेको चाँदीको भाउ शुक्रबारसम्म आइपुग्दा १ हजार ६२९ रुपैयाँ कायम भएको छ ।

लामो समयदेखि विश्व बजारमा सुनको भाउ बढिरहेको छ । केही करेक्सनहरुका बाबजुत मूल्य अझै माथि जान सक्ने अन्तर्राष्ट्रिय विश्लेषकहरुले बताइरहेका छन् ।

त्यसो त स्थानीय बजारमा पनि लामो समयदेखि नै तोलाको डेढ लाखसम्म पुग्ने अनुमान हुँदै आएको छ । सोही प्रक्षेपण अहिले लगभग सही साबित भइसकेको छ ।

किन भने सुन तोलाको करिब डेढ लाख नजिक आइपुगेको छ । अहिलेको अवस्थामा भाउ अझै माथि जान सक्ने सम्भावना देखिएको अन्तर्राष्ट्रिय सञ्चार माध्यमहरुले लेखेका छन् । तर बेलाबेला मूल्य केही घट्ने छ । तर घट्नेभन्दा बढ्ने दर नै बढी हुने प्रक्षेपणहरु आइरहेका छन् ।

यता, स्थानीय बजारमा भाउ अत्यधिक बढेपछि कारोबारमा भने कमी आएको सुन व्यापारीहरुको भनाई छ । अत्यावश्यक अवस्थामा बाहेक सुनका गरगहना किन्न नसक्ने अवस्थामा सर्वसाधारण पुगिसकेको देखिन्छ ।

विश्व बजारमा मूल्य तय हुने भएकाले मागमा कमी आए पनि स्थानीय बजारमा मूल्य घट्न सक्ने अवस्था भने छैन ।