काठमाडौं । नेपाल इन्फ्रास्ट्रक्चर्स इन्भेष्टमेन्ट फण्ड लिमिटेडले लाभांश घोषणा गरेको छ । इन्भेष्टमेन्ट कम्पनीले गत आर्थिक वर्षको मुनाफाबाट शेयरधनीलाई ४.८८ प्रतिशत बोनस शेयर तथा कर प्रयोजनका लागि ०.२७ प्रतिशत नगद गरी कुल ५.१५ प्रतिशत लाभांश दिने भएको हो ।

सोही प्रस्ताव पारित गर्न कम्पनीले पुस २६ गते झम्सिखेल ललितपुरमा दिउँसो साढे ३ बजेदेखि बस्नेगरी साधारण सभा आह्वान गरेको छ ।

साधारण सभामा गत आर्थिक वर्षको वार्षिक र लेखापरीक्षण प्रतिवेदन लगायत अन्य वित्तीय विवरण छलफल गरी पारित गर्ने, चालू आर्थिक वर्षका लागि लेखापरीक्षक नियुक्ति गरी निजको पारिश्रमिक निर्धारण गर्ने, सञ्चालकको नियुक्ति अनुमोदन गर्ने लगायतका प्रस्ताव पेश हुनेछन् ।

साथै सभाले संस्थाको पुँजी वृद्धि गर्न थप लगानीकर्ता भित्र्याउनुका साथै अन्य संस्थासँग मर्जरमा जान सञ्चालक समितिलाई अख्तियारी प्रदान गर्नेछ ।

साधारणसभा प्रयोजनका लागि पुस १९ गते एक दिन बुक क्लोज गर्ने भएको छ । पुस १८ गतेसम्म नेप्सेमा कायम रहने शेयरधनीले प्रस्तावित लाभांश पाउनुका साथै सभामा पनि सहभागी बन्ने अवसर पाउनेछन् ।