अमेरिकी राष्ट्रपति डोनाल्ड ट्रम्पले इरानसँगको जारी युद्ध र यसले उत्पन्न गराएको पछिल्लो परिस्थितिबारे जानकारी दिन बुधबार राति राष्ट्रका नाममा विशेष सम्बोधन गर्ने भएका छन्।

अमेरिका र इजरायलले इरानमाथि संयुक्त सैन्य कारबाही सुरु गरेको एक महिनाभन्दा बढी समय भइसकेको अवस्थामा ट्रम्पले पहिलो पटक यस्तो सम्बोधन गर्न लागेका हुन्।

ह्वाइट हाउसले सम्बोधनको विस्तृत विवरण सार्वजनिक नगरे पनि यो घोषणा ट्रम्प आफैँले इरानले युद्ध रोक्न चाहेको दाबी गरेको केही घण्टापछि आएको हो।

राष्ट्रपति ट्रम्पले आफ्नो सामाजिक सञ्जाल ‘ट्रुथ सोसल’ मार्फत इरानी राष्ट्रपतिले अमेरिकासँग युद्धविरामका लागि आग्रह गरेको उल्लेख गरेका छन्।

उनले इरानले विश्वकै महत्वपूर्ण तेल आपूर्ति मार्ग मानिने हर्मुज जलसन्धि स्वतन्त्र आवागमनका लागि खुला गरेमा मात्र युद्ध रोक्ने विषयमा विचार गर्न सकिने सर्त अघि सारेका छन्।

सो जलसन्धि खुला नगरेसम्म इरानलाई थप अस्तव्यस्त अवस्थामा धकेल्ने वा ढुङ्गे युगमा फर्काउने चेतावनी समेत उनले दिएका छन्। यद्यपि, इरानको तर्फबाट युद्धविरामको प्रस्ताव आएको भन्ने ट्रम्पको दाबीको अहिलेसम्म कुनै स्वतन्त्र पुष्टि भने हुन सकेको छैन।

यो सम्बोधन ट्रम्पका लागि निकै चुनौतीपूर्ण र अनिश्चित राजनीतिक मोडमा हुन लागेको छ। पछिल्ला सर्वेक्षणहरूले उनको लोकप्रियता अर्थात् अनुमोदन दर ४० प्रतिशतभन्दा तल झरेको देखाएका छन्।

इरानमाथिको सैन्य अभियानलाई लिएर अमेरिकी मतदाताहरू रुष्ट देखिएका छन् भने बहुसंख्यक नागरिकले यो आक्रमणको विरोध गरिरहेका छन्। विशेषगरी स्वतन्त्र मतदाताहरू युद्धको विपक्षमा उभिएका कारण ट्रम्पमाथि राजनीतिक दबाब गहिरो बन्दै गएको छ।

आर्थिक संकटले ट्रम्पको समस्यालाई झनै जटिल बनाइदिएको छ। युद्धका कारण वर्षौँपछि पहिलो पटक पेट्रोलको मूल्य प्रति लिटर एक डलरभन्दा माथि पुगेको छ, जसले गर्दा आम उपभोक्ताको विश्वास कमजोर भएको छ। यसले अमेरिकी अर्थतन्त्रमा ट्रम्पको पकडलाई थप कमजोर बनाएको विश्लेषण गरिएको छ।

यस्तो स्थितिमा राष्ट्रपतिका सन्देशहरू कहिले युद्ध तीव्र पार्ने त कहिले फिर्ता हुने भन्नेमा बाँडिएका छन्। उनले हालैका दिनमा युद्ध दुई–तीन हप्ताभित्रै सकिन सक्ने बताए पनि इरानको ऊर्जा पूर्वाधारमा थप आक्रमण गर्ने र स्थल सेना नै परिचालन गर्ने धम्की दिन छाडेका छैनन्।

यो अनिश्चित रणनीतिका कारण उनका निकटतम सहयोगीहरू समेत प्रशासनको दीर्घकालीन योजनालाई लिएर अन्योलमा देखिएका छन्।