दक्षिण कोरियाका राष्ट्रपति ली जे म्युङले शनिबार चिनियाँ राष्ट्रपति सी चिनफिङसँग पहिलो औपचारिक भेटवार्ता गरेका छन्।

सन् २०१४ पछि चिनियाँ राष्ट्रपतिको यो पहिलो दक्षिण कोरिया भ्रमण हो, जुन वर्षौँदेखिको तनावपूर्ण व्यापार र सांस्कृतिक सम्बन्धपछि भएको हो।

एसिया–प्रशान्त आर्थिक सहयोग (एपेक) शिखर सम्मेलनको अवसरमा भएको यो भेटमा राष्ट्रपति लीले सीसँग भने, ‘म व्यक्तिगत रूपमा भेट्न लामो समयदेखि उत्सुक थिएँ र उहाँको यात्रा सम्बन्धमा पुनः स्थापनाको रूपमा भएको छ।’

लीले दक्षिण कोरियाको सबैभन्दा ठूलो व्यापारिक साझेदार चीनसँग आर्थिक सहयोगको संरचनालाई ‘ठाडोबाट तेर्सो र पारस्परिक लाभप्रद’ दिशामा लैजान सहकार्य गर्नुपर्नेमा जोड दिए। राष्ट्रपति सीले चीन र दक्षिण कोरियालाई ‘सार्न नसकिने महत्वपूर्ण छिमेकी र अलग गर्न नसकिने साझेदार’ को सङ्ज्ञा दिए।

लीले प्राविधिक रूपमा युद्धमा रहेको उत्तर कोरियासँग बिग्रिएको सम्बन्ध पुनः जगाउन चीनको साझेदारी महत्वपूर्ण हुने बताए। उनले प्योङयाङसँग वार्ता पुनः सुरु गर्न मिलेर काम गर्नुपर्नेमा जोड दिए।

शिखर सम्मेलनमा भाग लिन दक्षिण कोरिया पुगेका अमेरिकी राष्ट्रपति डोनाल्ड ट्रम्पले चिनियाँ राष्ट्रपति सीसँग व्यापार विवाद समाधान गर्ने सहमति गरेलगत्तै बिहीबार स्वदेश फर्केका थिए।

ट्रम्पको अनुपस्थितिमा चिनियाँ नेता सी एपेक सम्मेलनको प्रमुख आकर्षण बनेका थिए, जहाँ उनले बेइजिङलाई अन्तर्राष्ट्रिय व्यवस्थामा अमेरिकाले फैलाएको अराजकताको विरुद्ध एक जिम्मेवार शक्तिको रूपमा चित्रण गरे।

सीले यो अवसरलाई चिसो सम्बन्ध रहेका देशहरूसँग सम्बन्ध सुधार गर्न प्रयोग गरे। उनले शुक्रबार क्यानडाका प्रधानमन्त्री मार्क कार्नी र जापानकी पहिलो महिला प्रधानमन्त्री साने ताकाइचीसँग पनि औपचारिक भेटवार्ता गरे।

ताकाइचीले सीसँग चीन र जापानबीच ‘रणनीतिक र पारस्परिक लाभदायी सम्बन्ध’ को पक्षमा रहने बताएकी छिन्।