काठमाडौं । केन्द्रीय बैंकले प्रणालीमा तरलता अधिक रहेको दाबी गरे पनि बैंकहरुले भने निक्षेप तानातानलाई छाडेका छैनन् । असोज १ गतेदेखि सुरु भएको यो बृद्विदर र यसमा एकअर्कालाई टप्न थालिएको ब्याजदर कात्तिक १ गतेबाट मा झनै बढेको छ ।

अधिकांश वाणिज्य बैंकहरुले आज कात्तिक १ गतेदेखि कार्यान्वयनमा आउने गरी नयाँ ब्याजदर सार्वजनिक गरिसकेका छन् । यसरी नयाँ ब्याज सार्वजनिक गर्नेमध्ये एनआइसी एशिया, लक्ष्मी, एनसीसी बैंक आक्रामक रुपमा अगाडि आएका छन् भने असोजमा आक्रामक देखिएका कतिपय बैंक कात्तिकमा केही सम्हालिएका छन् ।

आज थप केही वाणिज्य बैंकले ब्याजदर प्रकाशित गरेका छन् । तीमध्ये कुन बैंकको ब्याजदर कति पुग्यो हेरौं:

नबिल बैंक लि

नबिल बैंक लिमिटेड ब्याजदर वृद्धिमा केही नरम देखिएको छ । यो बैंकले ३ महिने र सोभन्दा बढी अवधिको व्यक्तिगत मुद्दति निक्षेपको ब्याजदर ८.७६ प्रतिशत कायम गरेको छ । एक वर्षे अवधिको कुमुलेटिभ फिक्स्ड डिपोजिटको ब्याजदर ८.५१ प्रतिशत तोकेको छ ।

यस्तै ३ महिने वा सोभन्दा बढी अवधिको संस्थागत मुद्दति निक्षेपको ब्याजदर ९।२६ प्रतिशत तोकिएको छ । नबिलले बचत खाताको ब्याजदर अधिकत ६.२६ प्रतिशत कायम गरेको छ । बैंकको भदौको आधार दर ६ प्रतिशत रहेको छ । अधिकांश लोनको ब्याजदर बेस रेटमा ३ देखि ६ प्रतिशतसम्म प्रिमियम थपेर तोकिएको छ ।

ग्लोबल आइएमई बैंक लि.

पूँजीको हिसाबले सबैभन्दा ठूलो वाणिज्य बैंक ग्लोबल आइएमई बैंक लि. पनि ब्याजदर वृद्धिमा खासै आक्रामक देखिएन । यो बैंकले कात्तिकका लागि सार्वजनिक गरेको नयाँ दर अनुसार ३ देखि ६ महिने अवधिको व्यक्तिगत मुद्दति निक्षेपमा ८.८० प्रतिशत ब्याज पाइनेछ ।

६ महिनादेखि १ वर्षे अवधिको व्यक्तिगत मुद्दतिमा ८.९० प्रतिशत र १ वर्ष वा सोभन्दा बढी अवधिको व्यक्तिगत मुद्दतिमा ९ प्रतिशत ब्याज पाइन्छ । संस्थागत मुद्दति निक्षेपमा समेत यही दर कायम गरिएको छ । संस्थागत बिडिंगको दर भने ९.५० प्रतिशत कायम गरिएको छ । यो बैंकले बचतको ब्याजदर अधिकत ४.५० प्रतिशत कायम गरेको छ। कर्जाको ब्याजदर खासै बढाइएको छैन ।

बैंक अफ काठमाण्डू लिमिटेड

यो बैंकले व्यक्तिगत र संस्थागत मुद्दतितर्फको ब्याजदर समान कायम गरेको छ । जसअन्तर्गत ३ देखि ६ महिने अवधिको मुद्दतिमा ७.५७ प्रतिशत, ६ महिनादेखि १ वर्ष अवधिको मुद्धतिमा ८.५७ प्रतिशत र एक वर्षे वा सोभन्दा बढी अवधिको मुद्धतिमा ९.५७ प्रतिशत ब्याजदर कायम गरिएको छ । बैंकको बचत खाताको अधिकतम ब्याजदर ६.५७ प्रतिशत कायम गरिएको छ ।

बैंकको भदौको आधार दर ७.३४ प्रतिशत रहेको छ । लोनको ब्याजदर आधार दरमा अधिकतम ६ प्रतिशतसम्म प्रिमियम थपेर कायम गरिएको छ ।

सिभिल बैंक लि

यो बैंकले व्यक्तिगत मुद्दति निक्षेपतर्फ विभिन्न अवधिका लागि भिन्ना भिन्नै ब्याजदर कायम गरेको छ । ३ महिने अवधिको व्यक्तिगत मुद्दति निक्षेपको ८.५१ प्रतिशत, ६ महिने अवधिको ८.७१ प्रतिशत, ९ महिने अवधिको ९.५१ प्रतिशत र १ वर्षभन्दा बढी अवधिको १०.११ प्रतिशत ब्याजदर कायम गरिएको छ ।

संस्थागत मुद्दतितर्फ ३ महिने अवधिका लागि ९.०१ प्रतिशत, ६ महिनादेखि १ वर्ष अवधिको ९.३१ प्रतिशत र एक वर्षभन्दा बढी अवधिका लागि ९.८१ प्रतिशत ब्याजदर तोकिएको छ ।
संस्थागत बिडिंगतर्फको ब्याजदर १०.६१ प्रतिशत तोकिएको छ । यो बैंकले बचतको अधिकतम ब्याजदर ६.५१ प्रतिशतसम्म तोकेको छ।

बैंकको भदौको आधारदर ८.०४ प्रतिशत रहेको छ । कर्जाको ब्याजदर आधार दरमा कम्तीमा २ देखि बढीमा ७ प्रतिशतसम्म प्रिमियम थपेर तोकिएको छ ।

सेञ्चुरी कमर्सियल बैंक लि

सेञ्चुरी कमर्सियल बैंक ठूला बैंकको तुलनामा ब्याजदर वृद्धिमा केही अनुशासित देखिएको छ । यो बैंकले व्यक्तिगत मुद्दति निक्षेप अन्तर्गत ३ महिनादेखि ६ महिने अवधिका लागि ९.२५ प्रतिशत, ६ महिनादेखि १ वर्ष अवधिका लागि ९.५० प्रतिशत र एक वर्षभन्दा बढी अवधिका लागि ९.७५ प्रतिशत ब्याजदर कायम गरेको छ । रेमिटान्स फिक्स्ड डिपोजिटका लागि भने १०.७५ प्रतिशत ब्याजदर तोकेको छ ।

संस्थागतर्फ मुद्दति निक्षेपको ब्याजदर ९।९९ प्रतिशत कायम गरिएको छ । बचत तर्फ सेञ्चुरीको अधिकतम ब्याजदर ६.२५ प्रतिशत रहेको छ । यो बैंकको भदौको बेसरेट ७.६५ प्रतिशत रहेको छ । कर्जाको नयाँ ब्याजदर बेस रेटमा न्यूनतम ३ देखि ६ प्रतिशतसम्म प्रिमियम जोडेर तय गरिएको छ ।

सिटिजन्स बैंक इन्टरनेशनल लिमिटेड

सिटिजन्स बैंकले व्यक्तिगत मुद्दति निक्षेपको ब्याजदर ९.२६ प्रतिशत तोकेको छ । तीन महिने वा सोभन्दा बढी अवधिको संस्थागत मुद्दति निक्षेपको ब्याजदर ९.७६ प्रतिशत कायम गरिएको छ ।.

सिटिजन्स एक्स्टा फिक्स्ड डिपोजिटको ब्याजदर ९.२६ प्रतिशत तोकिएको छ ।
सिटिजन्स बैंकले नववर्ष मासिक मुद्दति योजनाको ब्याजदर पनि सार्वजनिक गरेको छ । जस अन्तर्गत न्यूनतम ५ लाख रुपैयाँ जम्मा गर्नुपर्ने ३ महिनादेखि १२ महिने अवधिको प्रडक्टको ब्याजदर ८.५० प्रतिशत, १२ देखि २४ महिने अवधिको ब्याजदर ९ प्रतिशत तोकिएको छ ।

न्यूनतम ५० हजार राख्नुपर्ने गरी सिटिजन्स बैंकले दशैंतिहार मुद्दति निक्षेप योजना समेत ल्याएको छ । यसको ब्याजदर ९.२६ प्रतिशत कायम गरिएको छ । सिटिजन्स छैठ विशेष मासिक मुद्दति योजनाको ब्याजदर पनि ९.२६ प्रतिशत नै तोकिएको छ ।

यो बैंकको भदौको बेस रेट ७.९३ प्रतिशत छ । कर्जाको ब्याजदर न्यूनतम ०.२५ प्रतिशतदेखि ८ प्रतिशतसम्म बेस रेटमा प्रिमियम जोडेर कायम गरिएको छ ।

एभरेष्ट बैंक लि

एभरेष्ट बैंक ब्याजदर वृद्धिमा निकै संयमित देखिएको छ । यो बैंकले व्यक्तिगत मुद्दति निक्षेपको ब्याजदर ३ देखि ६ महिने अवधिका लागि ७ प्रतिशत, ६ महिनेदेखि १ वर्षका लागि ७.५ प्रतिशत,
र १ देखि १० वर्षे अवधिका लागि ८ प्रतिशत कायम गरेको छ ।

संस्थागत तर्फ ३ देखि ६ महिने अवधिका लागि ६.५० प्रतिशत, ६ महिनादेखि १ वर्ष अवधिका लागि ७ प्रतिशत र १ वर्षदेखि १० वर्षे अवधिका लागि ८ प्रतिशत ब्याजदर तोकिएको छ ।
यस्तै इन्स्टिच्यूसनल बल्क फिक्स्ड डिपोजिट, स्पेशल फिक्स्ड डिपोजिटको ब्याजदर ८.६१ प्रतिशत कायम गरिएको छ ।

नब्बे दिनको फिक्स्ड डिपोजिटको ब्याजदर पनि ८.६१ प्रतिशत नै कायम गरिएको छ । १०० दिनको संस्थागत मुद्दति निक्षेपको ब्याजदर ८.२५ प्रतिशत र २०० दिनको ८.५० प्रतिशत कायम गरिएको छ । बचतको ब्याजदर ४ प्रतिशत कायम गरिएको छ ।

बैंकको भदौको बेस रेट ५.९८ प्रतिशत रहेको छ । कर्जाको ब्याजदर बेस रेटमा न्यूनतम १.२५ प्रतिशतदेखि अधिकतम ५ प्रतिशतसम्म प्रिमियम जोडेर निर्धारण गरिएको छ ।

हिमालयन बैंक लिमिटेड

हिमालयन बैंकले ३ महिने अवधिको व्यक्तिगत मुद्दति निक्षेपको ब्याजदर ७.५० प्रतिशत कायम गरेको छ । ६ महिने अवधिका लागि ९ प्रतिशत, ९ महिने अवधिका लागि ९.५० प्रतिशत, १ वर्ष वा सोभन्दा बढी अवधिका लागि १०.५० प्रतिशत ब्याजदर कायम गरेको छ ।

यस्तै संस्थागत मुद्दतितर्फ ३ महिने अवधिका लागि ७.५० प्रतिशत, ६ महिने अवधिका लागि ७.७५ प्रतिशत, ९ महिने अवधिका लागि ८ प्रतिशत र १ वर्ष वा सोभन्दा बढी अवधिका लागि १०.२५ प्रतिशत ब्याजदर कायम गरेको छ । बचतको ब्याजदर अधिकतम ७।६७ प्रतिशत कायम गरिएको छ ।

कुमारी बैंक लिमिटेड

कुमारी बैंक लिमिटेडले ३ देखि ६ महिने अवधिको व्यक्तिगत मुद्दति निक्षेपको ब्याजदर ८.८१ प्रतिशत तोकेको छ । यस्तै, ६ महिनाभन्दा बढी अवधिको मुद्दति निक्षेपको ब्याजदर ९.८१ प्रतिशत कायम गरिएको छ । एक वर्ष वा सोभन्दा बढी अवधिको ब्याजदर ९.८१ प्रतिशत कायम गरिएको छ ।

संस्थागत मुद्दति तर्फ ३ देखि ६ महिने अवधिको ब्याजदर ९.३१ प्रतिशत र ६ महिनाभन्दा बढी अवधिको ब्याजदर १०.३१ प्रतिशत तोकिएको छ ।

यो बैंकको बचतको अधिकतम ब्याजदर ७।३१ प्रतिशत रहेको छ । बैंकको भदौको बेस रेट ८.०७ प्रतिशत रहेको छ । कर्जाको नयाँ ब्याजदर बेस रेटमा न्यूनतम १ देखि ६.५० प्रतिशतसम्म प्रिमियम जोडेर कायम गरिएको छ ।

माछापुच्छ्रे बैंक लिमिटेड

माछापुच्छ्रे बैंकले व्यक्तिगत मुद्दतितर्फ ३ महिनादेखि १ वर्षे अवधिका लागि ९.५० प्रतिशत ब्याजदर कायम गरेको छ । १ वर्षदेखि बढी अवधिको व्यक्तिगत मुद्दतितर्फको ब्याजदर पनि ९.५० प्रतिशत नै कायम गरिएको छ ।

संस्थागत मुद्दतितर्फको ब्याजदर भने सबै अवधिका लागि ९.८५ प्रतिशत तोकिएको छ । बैंकको बचत खाताको ब्याजदर अधिकतम ६.२५ प्रतिशत रहेको छ ।

मेगा बैंक लिमिटेड

मेगा बैंक लिमीटेडले व्यक्तिगत मुद्दति निक्षेपतर्फ ३ महिना वा सोभन्दा बढी अवधिको खाताका लागि ८.७७ प्रतिशत ब्याजदर कायम गरेको छ ।
यस्तै, संस्थागत मुद्दति निक्षेपको ब्याजदर ९.२७ प्रतिशत तोकिएको छ।.यो बैंकले बचततर्फ अधिकतम ५.७७ प्रतिशत ब्याज तोकेको छ । यो बैंकको भदौको बेस रेट ६.८० प्रतिशत रहेको छ ।

नेपाल बंगलादेश बैंक लि

नेपाल बंगलादेश बैंक पनि ब्याजदर वृद्धिमा आक्रामक देखिएको छ । यो बैंकले ३ देखि ६ महिना अवधिको व्यक्तिगत मुद्दति निक्षेपको ब्याजदर १० प्रतिशत तोकेको छ । ६ महिनाभन्दा बढी अवधिको ब्याजदर १०.२८ प्रतिशत कायम गरिएको छ ।

यस्तै संस्थागत मुद्दति तर्फ ३ देखि ६ महिना अवधिको ब्याजदर १० प्रतिशत र ६ महिनादेखि माथि अवधिको ब्याजदर १०.२८ प्रतिशत तोकिएको छ । बैंकले बचत खातामा अधिकतम ५.२८ प्रतिशत ब्याजदर तोकेको छ ।

एनएमबी बैंक लिमिटेड

एनएमबी बैंकले संस्थागत मुद्दति निक्षेपतर्फ ३ महिने अवधिको ब्याजदर ७.५० प्रतिशत, ४ महिनेदेखि १ वर्ष अवधिको ९ प्रतिशत र १ वर्षभन्दा बढी अवधिको ९.५२ प्रतिशत कायम गरेको छ । यस्तै व्यक्तिगत मुद्दति निक्षेपतर्फ सबै खालको खाताको ब्याजदर ९.५७ प्रतिशत तोकिएको छ । बचतको अधिकतम ब्याजदर ६.५७ प्रतिशत कायम गरिएको छ ।

नेपाल एसबीआई बैंक लि

नेपाल एसबीआई बैंकले व्यक्तिगत मुद्दति निक्षेपतर्फ ३ देखि ६ महिने अवधिका लागि ५.०६ प्रतिशत कायम गरेको छ । ६ महिनादेखि १ वर्ष अवधिका लागि ७.०६ प्रतिशत ब्याजदर कायम गरिएको छ भने एक वर्षदेखि २ वर्ष अवधिका लागि ८.५६ प्रतिशत, २ देखि ३ तथा ३ देखि १० वर्षे अवधिको मुद्दतिमा समेत ८.५६ प्रतिशत ब्याजदर तोकिएको छ ।

यस्तै १०१ दिने मुद्दति निक्षेपमा ५.०६ प्रतिशत तथा २०१ दिने मुद्दतिमा ७.०६ प्रतिशत ब्याजदर निर्धारण गरिएको छ । संस्थागत मुद्दतितर्फ पनि व्यक्तिगतको झै ब्याजदर कायम गरिएको छ।

बैंकले बल्क फिक्स्ड डिपोजिटतर्फ १ देखि २ वर्षे अवधिका लागि ९.०६ प्रतिशत तथा २ देखि ३ वर्षे अवधिका लागि ८.७६ प्रतिशत ब्याजदर तोकिएको छ । बचत तर्फको अधिकतम ब्याजदर ४.५६ प्रतिशत रहेको छ भने यो बैंकको भदौको बेस रेट ७.३९ प्रतिशत रहेको छ ।

सिद्धार्थ बैंक लिमिटेड

सिद्धार्थ बैंकले ३ महिने वा सोभन्दा बढी अवधिको व्यक्तिगत मुद्दति निक्षेपको ब्याजदर १०.३ प्रतिशत कायम गरेको छ । यस्तै ५ वर्षे अवधिका लागि ८.४४ प्रतिशत तथा १० वर्षे अवधिका लागि ८.७५ प्रतिशत ब्याजदर कायम गरिएको छ ।

संस्थागत मुद्दति निक्षेपतर्फ ३ महिना वा सोभन्दा बढी अवधिका लागि १०.३ प्रतिशत ब्याजदर तोकिएको छ ।
यो बैंकले बचतमा अधिकतम ५.३ प्रतिशत ब्याजदर तोकेको छ भने बैंकको भदौको आधार दर ६.८८ प्रतिशत रहेको छ ।