काठमाडौं । सार्वजनिक ऋण व्यवस्थापन कार्यालयले सोमबार १७ अर्ब ७५ करोड रुपैयाँ बराबरको ट्रेजरी बिल बोलकबोल गर्ने भएको छ ।

नेपाल सरकारको राष्ट्र ऋण बोलकबोल तालिका अनुसार सोमबार उक्त ट्रेजरी बिल बोलकबोल हुन लागेको हो ।

सार्वजनिक ऋण व्यवस्थापन कार्यालयका अनुसार ५ अर्ब रुपैयाँ बराबरको नयाँ (फ्रेंस) तथा १२ अर्ब ७५ करोड रुपैयाँ बराबरको ट्रेजरी बिल नवीकरणको लागि बोलकबोल हुन लागेको हो ।

बोलकबोलमा आज विहान १० बजेदेखि दिउँसो ३ बजेसम्म अनलाइन माध्यमबाट सहभागी हुन सकिनेछ । सोमबार बोलकबोल हुने ट्रेजरी बिल मंगलबार निष्कासन हुने कार्यालयले जनाएको छ ।

सरकारले ५ अर्ब बराबरको २८ दिने र ७ अर्ब ७५ करोड बराबरको ९१ दिने ट्रेजरी बिल नविकरण गर्न लागेको हो भने ५ अर्ब बराबरको १८२ दिने नयाँ ट्रेजरी बिल जारी गरेको हो ।

सरकारले यसअघि नयाँ ट्रेजरी बिल जारी गरेर ३० अर्ब तथा विकास ऋणपत्र बिक्री मार्फत ८० अर्ब आन्तरिक ऋण उठाइसकेको छ ।

सरकारले चालु आवको पहिलो त्रैमास अर्थात असोजमसान्तसम्म १ खर्ब १५ अर्ब आन्तरिक ऋण उठाउने तालिका सार्वजनकि गरेको थियो ।

आज सरकारले ५ अर्ब रुपैयाँ बराबरको नयाँ ट्रेजरी बिल बोलकबोल गरेपछि चालु आर्थिक वर्षको पहिलो त्रैमास अर्थात असोजसम्म उठाउने आन्तरिक ऋणको लक्ष्य समेत पूरा हुनेछ ।

बैंक वित्तीय संस्थामा लगानी योग्य पुँजी पर्याप्त भएपछि ट्रेजरी बिलको ब्याजदरमा समेत गिरावट आएको छ । अहिले सबै प्रकारका ट्रेजरी बिलको ब्याजदर ३ प्रतिशत भन्दा तल नै रहेको छ ।

यसअघि गत असोज ७ गते बोलकबोलमा ९१ दिन अवधिको ट्रेजरी बिलको औसत डिस्काउन्ट रेट २.९५ प्रतिशत कायम भएको थियो ।

चालु आर्थिक वर्षमा सरकारले बजेटमार्फत ३ खर्ब ३० अर्ब रुपैयाँ आन्तरिक ऋण उठाउने लक्ष्य राखेको छ ।

यसै क्रममा सरकारले चालु आर्थिक वर्ष सुरु भएयता हालसम्म १ खर्ब १० अर्ब रुपैयाँ आन्तरिक ऋण उठाइसकेको छ । सरकारले ट्रेजरी बिल्स र विकास ऋणपत्र बिक्री गरेर आन्तरिक ऋण उठाएको हो ।