काठमाडौं । गरिमा क्यापिटल लिमिटेडले आफ्नो पहिलो म्युचुल फण्ड ‘गरिमा समृद्धि योजना’ निष्कासन तथा बिक्री आजदेखि (पुस ७) खुला गरेको छ ।

कम्पनीले १० वर्ष अवधिको उक्त फण्डको प्रतिइकाइ १० रुपियाँ अंकित दरमा १ अर्ब रुपियाँ बराबरको १० करोड इकाइ बिक्रीमा ल्याएको हो ।

कम्पनीले निष्कासन गर्ने कुल इकाइमध्ये कुल बिक्री भएको इकाइसंख्याको १४ प्रतिशत वा १ करोड ४० लाख इकाइ कोष प्रवर्धक गरिमा विकास बैंकलाई र १० लाख इकाइ योजना व्यवस्थापक कम्पनी गरिमा क्यापिटल लिमिटेडलाई सुरक्षित गरी बाँकी रहेको ८ करोड ५० लाख इकाई सर्वसाधारणलाई बिक्री गर्नेछ ।

सो फण्डको इकाइमा लगानीकर्ताले पुस ११ गतेसम्म आवेदन दिन सक्नेछन् । तर तोकिएको समयमा आवेदन परेमा आवेदन मिति पुस २१ सम्म लम्बिनेछ । लगानीकर्ताले न्यूनतम १०० इकाइ र अधिकत १ करोड इकाइसम्म आवेदन दिन पाउनेछन् ।

फण्डको धितोपत्र निष्कासन तथा बिक्री प्रबन्धक गरिमा क्यापिटल लिमिटेड रहेको छ । यो एक बन्दमुखी योजना हो ।