आर्थिक सञ्जाल २०७७ वैशाख २८ गते आइतबार

काठमाडौँ । चालु आर्थिक वर्षको तेस्रो त्रैमाससम्म आइपुग्दा नेपाल बैंकको अधिकांश सूचक घटेको छ । यस अवधिमा वितरण योग्य नाफा ह्वातै घटेको छ । वितरण योग्य रकम १०३.८२% ले घटेर ६ करोड १९ लाख ८२ हजार रुपैयाँ नोक्सानमा आइपुगेको छ ।

गत वर्ष बैंकको वितरण योग्य नाफा १ अर्ब ६२ करोड १६ लाख ९६ हजार रुपैयाँ थियो । बैंकले १ अर्ब ६५ करोड रुपैयाँ नियामकीय जगेडामा ट्रान्सफर गरेका कारण वितरण योग्य मुनाफा ऋणात्मक भएको हो ।

रिटेन्ड् अर्निङ शीर्षकमा भने आकर्षक वृद्धि देखिएको छ । चैत मसान्त सम्म आइपुग्दा बैंकको खुद नाफा पनि घटेको छ ।

खुद नाफा ११.०८% ले घटेर १ अर्ब ९९ लाख ६५ हजार रुपैयाँमा खुम्चिएको छ । गत वर्ष यसले २ अर्ब २४ करोड ५५ लाख ७६ हजार रुपैयाँ नाफा कमाएको थियो । खुद ब्याज आम्दानी र सञ्चालन नाफा दुवै घटेकाले खुद नाफा प्रभावित भएको हो ।

खुद ब्याज आम्दानी र सञ्चालन नाफा क्रमशः १०.७९% र १५.१३% ले घटेको छ । तेस्रो त्रैमाससम्म आइपुग्दा प्रतिसेयर आम्दानी ३ रुपैयाँ ३९ पैसाले घटेर २७ रुपैयाँ १३ पैसामा सीमित भएको छ । प्रतिसेयर नेटवर्थ २९६ रुपैयाँ १३ पैसा रहेको छ ।