काठमाडौं । बीवाईडीको चर्चित विद्युतीय एसयूभी एट्टो३ अव फ्ल्यास चार्जिङ सुबिधासहित उपलब्ध हुने भएको छ । चिनियाँ बजारमा औपचारिक लन्च हुने तयारीमा रहेको नयाँ एट्टो३ मा नयाँ प्रबिधीको चार्जिङ सुबिधा र बढि रेन्ज पाइने एमआईआईटीले खुलासा गरेको हो ।

प्रकाशित जानकारी अनुसार, नयाँ मोडेल ५७.५४ किलोवाट आजर र ६८.५४ किलोवाट आवर ब्याट्री प्याकमा उपलब्ध हुनेछ, जसले क्रमशः ५४० किलोमिटर र ६३० किलोमिटरको सीएलटीसी रेन्ज प्रदान गर्दछ ।

नयाँ एट्टो३ मा पूर्ण रूपमा नयाँ रियर–ह्वील–ड्राइभ प्योर इलेक्ट्रिक प्लेटफर्म, दोस्रो पुस्ताको ब्लेड ब्याट्री प्रविधि र उन्नत फ्ल्यास चार्जिङ क्षमता उपलब्ध हुने उल्लेख गरिएको छ

बीवाईडीको डाइनस्टि फेमिली डिजाइन ल्यांग्वेजमा आधारित सो नयाँ एसयूभीको फ्रन्ट फेसियामा पातलो, कालो हेडलाइटले घेरिएको सिल्भर ग्रिल प्यानल रहने उल्लेख गरिएको छ । नयाँ एट्टो३ हालको मोडल भन्दा केही ठूलो समेत हुनेछ ।

नयाँ एट्टो३ मा पछाडि माउन्ट गरिएको सिंगल मोटर जडान गरिनेछ, जुन २०० किलोवाट र २४० किलोवाट मोटर क्षमतामा उपलब्ध हुनेछ ।

दोस्रो पुस्ताको ब्लेड ब्याट्री प्रविधिले प्रभावशाली चार्जिङ कार्यसम्पादन सक्षम बनाउने दाबी गरिएको छ भने फ्ल्यास चार्जिङ प्रविधिको प्रयोग गरी कारलाई केवल ५ मिनेटमै १० देखि ७० प्रतिशतसम्म चार्ज गर्न सकिन्छ । त्यसैगरी, केवल ९ मिनेटमा १० देखि ९७ प्रतिशतसम्म चार्ज गर्न सकिन्छ ।