काठमाडौं । बजाज अटोले आफ्नो लोकप्रिय टुरिङ मोटरसाइकल डोमिनार ४०० को नयाँ संस्करण लन्च गरेको छ। नयाँ मोडलमा सबैभन्दा ठूलो परिवर्तन मूल्य र इन्जिनमा गरिएको परिमार्जन हो ।

कम्पनीले नयाँ डोमिनार ४०० को मूल्यमा उल्लेखनीय रूपमा ३७ हजार भारुले कटौती गरेको छ। यसको एक्स–शोरूम मूल्य अब २ लाख ४ हजार भारु कायम गरिएको छ । मूल्य घटाउनुको मुख्य कारण इन्जिनको क्षमता घटाएर कम कर दायरामा ल्याउनु हो।

भारतमा ३५० सीसीभन्दा बढी इन्जिन क्षमता भएका मोटरसाइकलमा उच्च कर लाग्ने व्यवस्था छ। यसै कारण बजाजले पुरानो ३७३ सीसी इन्जिनलाई घटाएर ३४९ सीसी बनाएको छ, जसले बाइकलाई कम कर श्रेणीमा राख्न मद्दत गरेको छ। यस परिवर्तनले कम्पनीलाई मूल्य घटाएर ग्राहकलाई प्रत्यक्ष फाइदा दिन सहज बनाएको छ।

इन्जिनतर्फ हेर्दा, नयाँ ३४९ सीसी इन्जिन पुरानै संरचनामा आधारित भए पनि यसको स्ट्रोक घटाइएको छ भने बोर कायम राखिएको छ। यस परिवर्तनका बावजुद पावरमा वृद्धि भएको छ। नयाँ मोडलले ४०।६ हर्सपावर उत्पादन गर्छ, जुन अघिल्लो मोडलभन्दा थोरै बढी हो । यद्यपि टर्क भने ३५ एनएमबाट घटेर ३३।२ एनएम पुगेको छ। पिक टर्क अब ७५०० आरपीएममा उपलब्ध हुन्छ । बाइकमा पहिले जस्तै ६ स्पिड गियरबक्स जडान गरिएको छ ।

साथै बाइकको तौल पनि घटाइएको छ। नयाँ डोमिनार ४०० को तौल अब १९० किलोग्राम रहेको छ, जुन अघिल्लो मोडलभन्दा ३ किलोग्राम कम हो। यद्यपि बाइकको डिजाइनमा कुनै परिवर्तन गरिएको छैन। यसमा एलईडी हेडलाइट, डिजिटल कन्सोल तथा टुरिङ सुविधाहरू जस्ताका तस्तै राखिएको छ।