वासिङटन डिसि। विदेशमा बस्ने नेपालीलाई यथास्थानमा मतदानको व्यवस्था गर्न माग गर्दै नेकपा (एमाले) को विदेश स्थित भातृ संगठन ‘प्रवासी नेपाली मन्च अन्तर्राष्ट्रिय कमिटी’ ले नेपाल सरकार र विभिन्न मुलुकमा रहेका नेपाली दुतावासमा यही माघ १० गते ज्ञापन पत्र बुझाउने भएको छ ।

सर्वोच्च अदालतले २०७४ चैतमा विदेशमा रहेका नेपाली नागरिकलाई सोही स्थानबाट मतदान गर्ने व्यवस्था मिलाउन नेपाल सरकारलाई निर्देशन दिएको थियो । सर्वोच्च अदालतको सो फैसला अझै कार्यन्वयनमा आएको छैन ।

अन्तर्राष्ट्रीय कमिटीका प्रचार विभाग प्रमुख तथा अमेरिकाका अध्यक्ष प्रभु थापाले अनुसार नेपालमा परराष्ट्र मन्त्री डा.नारायण खडका र निर्वाचन आयोगका प्रमुख आयुक्त दिनेश कुमार थपलियालाई ज्ञापन पत्र बुझाइने छ ।

यस्तै विश्वभरी रहेका नेपाली दुतावासमा पनि सोही देशका कमिटीले ज्ञापन पत्र बुझाउने कार्यक्रम रहेको छ ।

थापाका अनुसार जनवरी २२ तारेख सोमवारका दिन नेपालको समय एक बजे ज्ञापन पत्र बुझाइने छ । अन्य मुलुकमा भने अनुकुल समयमा ज्ञापन पत्र बुझाइने छ । नेपाली नागरिकको नैसर्गिक अधिकार हो मतदान, सर्वोच्चले पनि जो जहाँ छन् त्यहीबाट मतदानको व्यवस्था गराउनु भनेको छ त्यो कार्यन्वयन हुनु पर्छ भन्ने मञ्चको माग हो। त्यसैका लागि दवाव दिन मञ्चले ज्ञापन पत्र बुझाउन लागेको हो ।

आधिकारिक तथ्यांक नभए पनि मुलुकको कुल जनसंख्याको लगभग एक तिहाइ नेपाली नागरिक नेपाल भन्दा बाहिरि मुलुकमा काम,व्यापार र अध्ययनका सिलसिलामा रहेको अनुमान छ ।