काठमाडौं । नेपालका अर्थमन्त्री डा. स्वर्णिम वाग्ले विश्वप्रसिद्ध अमेरिकी पत्रिका ‘टाइम’ले सार्वजनिक गरेको सन् २०२६ का जलवायु नेतृत्वकर्ताको सूचीमा समेटिएका छन् ।

जलवायु परिवर्तनविरुद्ध व्यावसायिक क्षेत्रमा मापनयोग्य, प्रभावकारी र समतामूलक काम अघि बढाउने १०० जना नेतृत्वकर्ताको सूचीमा वाग्ले पनि परेका हुन् । ‘टाइम–१०० क्लाइमेट २०२६’ शीर्षकको सूचीमा अर्थमन्त्री डा. वाग्लेलाई ‘नेता’ समूहमा राखिएको छ ।

‘टाइम’मा प्रकाशित विवरणअनुसार नेपालमा गत अगस्टमा आएको हिमताल विस्फोटपछिको भोटेकोशीको बाढीले ठूलो जनधनको क्षति पुर्‍याएपछि वाग्लेले जलवायु परिवर्तनबाट बढी प्रभावित विकासशील मुलुकको अवस्थालाई अन्तर्राष्ट्रिय समुदायसमक्ष उठाउँदै आएका छन् ।

विश्वव्यापी हरितगृह ग्यास उत्सर्जनमा नेपालको योगदान न्यून भए पनि जलवायु सङ्कटको असर नेपालजस्ता कमजोर मुलुकले बढी भोग्नुपरेको विषयमा उनले जोड दिएको पत्रिकाले उल्लेख गरेको छ ।

बाढीपछिको पुनर्निर्माणका लागि करिब पाँच अर्ब अमेरिकी डलर आवश्यक पर्ने अनुमानसहित वाग्लेले जलवायु क्षति तथा नोक्सानी कोषबाट सहयोगका लागि पहल गरिरहेका छन् ।

नेपाल सरकारले हरितगृह ग्यास उत्सर्जन गर्ने प्रमुख तीन मुलुक चीन, अमेरिका र भारतसँग जलवायु क्षतिपूर्तिका लागि औपचारिक आग्रह समेत गरेको विवरणमा उल्लेख छ ।

संयुक्त राष्ट्रसंघले अक्टोबर २२ मा नेपालका लागि उक्त कोषबाट दुई करोड १६ लाख अमेरिकी डलर उपलब्ध गराउने प्रस्तावलाई प्रारम्भिक स्वीकृति दिएको पनि पत्रिकाले जनाएको छ ।

यस वर्षको सूचीमा वाग्लेसँगै सामोआकी पूर्वप्रधानमन्त्री फियामे नाओमी माताफा, बेलायतका राजकुमार विलियम, युरोपेली आयोगकी अध्यक्ष उर्सुला भोन डर लेयेन, संयुक्त राष्ट्रसंघका महासचिव एन्टोनियो गुटेरेस तथा कोप–३१ का नेतृत्वकर्ता मुरात कुरुम र क्रिस बोवेन पनि समेटिएका छन् ।

त्यस्तै, भारतको महिन्द्रा लास्ट माइल मोबिलिटीकी प्रमुख सुमन मिश्रा, आइबरड्रोला एस्पानाका प्रमुख मारियो रुइज–टाग्ले र चिलीका प्राध्यापक तथा पूर्व यातायातमन्त्री हुआन कार्लोस मुनोज पनि सूचीमा छन्।

‘टाइम’ले पछिल्लो १२ महिनामा जलवायु क्षेत्रमा हासिल गरेका मापनयोग्य तथा दिगो उपलब्धिलाई आधार बनाएर सय जना नेतृत्वकर्ता छनोट गरेको जनाएको छ । सूचीलाई टाइटन्स, लिडर्स, इनोभेटर्स, डिफेन्डर्स र क्याटालिस्ट्स गरी पाँच समूहमा विभाजन गरिएको छ ।