काठमाडौं । सिद्धार्थ बैंकले आज पुस २८ गते तेइसौं वार्षिक साधारण सभा डाकेको छ । साधारण सभाले सेयरधनीहरुलाई गत आर्थिक वर्षको नाफाबाट कर सहित प्रस्ताव गरेको ४ प्रतिशत नगद लाभांश वितरण गर्ने प्रस्ताव पारित गर्नेछ ।

यस्तै, बैंकले १०० रुपैयाँका दरले ३ अर्ब ५० करोड रुपैयाँ बराबरको एसबीएल ८.२५ प्रतिशत अविमोच्य असञ्चिति अग्राधिकार सेयर जारी गर्ने प्रस्ताव पेश गर्नेछ ।

अन्य उपयुक्त बैंक तथा वित्तीय संस्थाहरुसँग मर्जर अथवा एक्विजिशन सम्बन्धि कार्य गर्न तथा बैंकको प्रबन्धपत्र तथा  नियमावली  संशोधन गर्न सञ्चालक  समितिलाई  अख्तियारी दिने  प्रस्ताव पनि छ ।

लेखापरीक्षक नियुक्त गर्ने लगायतका प्रस्तावहरु पनि उक्त सभाले पारित गर्नेछ । साधारण सभामा संस्थापक समूहको तर्फबाट ३ जना र सर्वसाधारण समूहको तर्फबाट २ जना सञ्चालकको निर्वाचन गर्ने एजेन्डा पनि रहेको छ ।

साधारण सभा प्रयोजनार्थ बैंकले गत पुस १४ गते एक दिनका लागि बुक क्लोज गरेको छ । तसर्थ, पुस १३ गतेसम्म कायम सेयरधनीले प्रस्तावित लाभांश र साधारण सभामा भाग लिन पाउने छन् । साधारण सभा, आर्मी अफिसर्स, क्लब भद्रकाली काठमाडौंमा बिहान १०.३० बजेदेखि सुरु हुनेछ ।