जर्मन क्लब बायर लिभरकुसेनलाई पराजित गर्दै इटालियन क्लब एटलान्टाले युरोपा लिगको उपाधि उचालेको छ । बुधबार राति अभिभा स्टेडियम डब्लिनमा भएको फाइनलमा बायर लिभरकुसेनलाई ३–० ले पराजित गर्दै एटलान्टाले उपाधि जितेको हो ।

पहिलो  पटक फाइनल पुगेको एटलान्टालाई च्याम्पियन बनाउन एडेमोला लोकमनले ह्याट्रिक पूरा गरे । खेलको १२औं मिनेटमा लोकमनको गोलमा एटलान्टाले शुरूआती अग्रता बनाएको थियो। २६औं मिनेटमा लोकमनको व्यक्तिगत दोस्रो गोलमा एटलान्टाले अग्रता दोब्बर गर्‍यो ।

खेलको ७६औं मिनेटमा लोकमनले व्यक्तिगत तेस्रो गोल गर्दा ह्याट्रिक पूरा गरेका हुन् ।

पहिलो पटक युरोपा लिगको फाइनलमा पुगेको लिभरकुसेनले उपविजेतामा चित्त बुझायो । एटलान्टासँगको हारसँगै जर्मन च्याम्पियन लिभरकुसेनको अपराजित यात्रामा पूर्णविराम लागेको छ । लिभरकुसेन यो सिजन ५१औं खेलसम्म अपराजित रहेको थियो ।

२७ मे २०२३ को जर्मन बुन्डेसलिगामा भिएफएल बोचुमसँग ३–० ले पराजित भएयता लिभरकुसेन अपराजित थियो । जसमा ४२ खेलमा जित र ९ खेलमा बराबरीको नतिजा छ ।