काठमाडौं । ट्रेजरी बिलको औसत ब्याजदर फेरि साढे ४ प्रतिशत नजिक पुगेको छ। अघिल्लो ट्रेजरी बिलभन्दा औसत ब्याजदर ०.३० को विन्दुले बढेको हो।

नेपाल राष्ट्र बैंकले आज पुस १७ गते जारी भएको २० अर्ब २५ करोड रुपैयाँको बोलकबोल हिजो पुस १६ गते गरेको थियो। जसमा बैंक तथा वित्तीय संस्थाहरुबाट कुल ५८ अर्ब ६९ करोड रुपैयाँको आवेदन परेको थियो।

केन्द्रीय बैंकले ९१ दिने ७ अर्ब ७५ करोड रुपैयाँ, १८२ दिने ५ अर्ब रुपैयाँ र ३६४ दिने ७ अर्ब ५० करोड रुपैयाँको ट्रेजरी बिल जारी गरेको छ।

जसमा बैंक तथा वित्तीय संस्थाहरुबाट क्रमशः २४ अर्ब ६५ करोड रुपैयाँ, १६ अर्ब ४४ करोड रुपैयाँ र १७ अर्ब ६० करोड रुपैयाँको आवेदन परेको थियो। यी ट्रेजरी बिल क्रमशः चैत २० गते, २०८१ असार १९ गते र २०८१ पुस १६ गते परिपक्व हुनेछन्।

राष्ट्र बैंकका अनुसार बोलकबोलमार्फत औसत ब्याजदर ९१ दिने ट्रेजरी बिलको ३.४० प्रतिशत, १८२ दिने ट्रेजरीको ३.९४ प्रतिशत र ३६४ दिने ट्रेजरीको ४.४४ प्रतिशत कायम भएको छ।