काठमाडौं । चालु आर्थिक वर्ष सुरु भएसँगै विभिन्न वित्तीय संस्था र कम्पनीहरूले लाभांश घोषणा गरिरहेका छन्।

हालसम्म दुई दर्जन कम्पनीले लाभांश वितरण गर्ने प्रस्ताव गरेका छन्। तीमध्ये ५ वटा वाणिज्य बैङ्कले लाभांश वितरण गर्ने घोषणा गरेका छन्।

लाभांश प्रस्ताव गर्नेहरूमा सिटिजन्स बैंक, माछापुच्छ्रे बैंक, एभरेस्ट बैङ्क, सानिमा बैंक र एनआईसी एसिया बैंक छन्।

सिटिजन्स बैंकले ५.७९ प्रतिशत लाभांश घोषणा गरेको छ। बैङ्कले ५.७९ प्रतिशत नगद लाभांश वितरण गर्ने प्रस्ताव गरेको छ।

माछापुच्छ्रे बैंकको भदौ १३ गते बसेको सञ्चालक समितिको बैठकले सेयर धनीहरुलाई १४ प्रतिशत लाभांश वितरण गर्ने प्रस्ताव गरेको छ।

बैंकले गत आर्थिक वर्ष २०७९/८० को नाफाबाट हाल कायम चुक्ता पुँजीको १३.३० प्रतिशत बोनस सेयर र कर प्रयोजनको लागि ०.७० प्रतिशत नगद गरी कूल १४ प्रतिशत लाभांश वितरण गर्ने प्रस्ताव गरेको हो।

त्यस्तै, एभरेस्ट बैंकको सञ्चालक समितिको भदौ २७ गते बसेको बैठकले गत वर्षको नाफाबाट सेयर धनीहरुलाई २०.५३ प्रतिशत लाभांश वितरण गर्ने प्रस्ताव गरेको छ।

बैंकले आर्थिक वर्ष २०७९/८० को नाफाबाट सेयर धनीहरुलाई हाल कायम चुक्ता पुँजीको १० प्रतिशत बोनस सेयर र १०.५३ प्रतिशत नगद गरी कूल २०.५३ लाभांश वितरण गर्ने प्रस्ताव गरेको हो।

त्यस्तै, सानिमा बैंकको भदौ २८ गते बसेको सञ्चालक समितिको बैठकले गत वर्षको नाफाबाट सेयर धनीहरुलाई १४.७० प्रतिशत लाभांश वितरण गर्ने प्रस्ताव गरेको छ।

बैंकले आर्थिक वर्ष २०७९/८० को नाफाबाट सेयर धनीलाई हाल कायम चुक्ता पुँजीको ९ प्रतिशत बोनस सेयर र ५.७ प्रतिशत नगद गरी कूल १४.७० लाभांश वितरण गर्ने प्रस्ताव गरेको हो।

यस्तै, एनआईसी एसिया बैंकको सञ्चालक समितिको भदौ २९ गते बसेको बैठकले गत वर्षको नाफाबाट सेयर धनीहरुलाई ३०.५ प्रतिशत लाभांश वितरण गर्ने प्रस्ताव गरेको छ।

बैंकले आर्थिक वर्ष २०७९/८० को नाफाबाट सेयर धनीलाई हाल कायम चुक्ता पुँजीको २९ प्रतिशत बोनस सेयर र १.५ प्रतिशत नगद गरी कूल ३०.५ लाभांश वितरण गर्ने प्रस्ताव गरेको हो।

बैंकले प्रस्ताव गरेको उक्त लाभांश नेपाल राष्ट्र बैंकबाट स्वीकृत भई आगामी साधारण सभाले पारित गरेपछि सेयरधनीहरुलाई वितरण गरिने छ।

माछापुच्छ्रे बैंकले भने लाभांश वितरण प्रस्ताव पारित गर्न वार्षिक साधारण सभा पनि आह्वान गरिसकेको छ।