काठमाडौं  । नेपाली खेलकुदको कार्यकारी निकाय राष्ट्रिय खेलकुद परिषद्को सदस्य सचिवमा रमेश सिलवाल पुनः नियुक्त भएका छन् ।
पदमुक्त भएको झण्डै तीन महिनापछि राखेप सदस्य सचिवमा पुनः नियुक्त भएका हुन् । सोमबार बालुवाटारमा बसेको मन्त्रिपरिषद्को बैठकले सिलवाललाई चार वर्षका लागि सदस्य सचिवमा नियुक्त गरेको हो ।

युवा तथा खेलकुद मन्त्री जगतबहादुर विश्वकर्मा याँ खेलकुद विकास ऐन २०७७ का आधारमा छनोट भएकाहरुको नाम मन्त्रिपरिषद्मा प्रस्ताव गर्नु भएको हो । राखेप सदस्य सचिव पहिलो पटक छनोटका आधारमा भएको हो ।

नयाँ ऐन अनुसार युवा तथा खेलकुद मन्त्रालयका सचिवको संयोजकत्वमा रहेको सिफरिस समितिले पठाएको एक महिला सहित ३ जनाबाट सिलवाल सदस्य सचिव नियुक्त भएका हुन् ।

समितिले राष्ट्रिय महिला भलिबल टोलीकी पूर्व कप्तान अन्जु श्रेष्ठ र नेपाल भलिबल संघका पूर्व उपाध्यक्ष नेकपाका नेता लिलबहादुर थापाको नाम सिफारिस गरेको थियो । पाँच वटा मापदण्ड पूरा गरेका २७ जनाले सदस्य सचिवका लागि आवेदन दिएका थिए ।