काठमाडौं । राज्यको बजेट तथा दातृ निकायको ऋण र अनुदानबाट बन्ने दर्जनौं आयोजना र विकासका पूर्वाधारहरूको गुणस्तर परीक्षण यो वर्ष नहुने भएको छ । आर्थिक वर्ष २०७९/८० को बजेट कार्यान्वयनसम्बन्धी बनेको मार्गदर्शन र बजेट कटौतीका कारण यस्तो परिस्थिति सिर्जना भएको हो ।

मार्गदर्शनमा निर्माण कार्यको ठेक्का सम्झौतापछि थालिएका १० करोडमाथिका आयोजनाको गुणस्तरको प्राविधिक परीक्षण राष्ट्रिय सतर्कता केन्द्रबाट गराउने उल्लेख छ ।

कार्यक्रम र आयोजनाको भौतिक प्रगति र गुणस्तरका आधारमा मात्र भुक्तानी दिने व्यवस्था गर्न पनि उक्त मार्गदर्शनमा उल्लेख छ । तर सतर्कता केन्द्रले भने नियमानुसार पाइएको अधिकार प्राविधिक परीक्षण गर्न नसक्ने जनाएको छ ।

सरकारले बजेट कटौती गरेपछि प्राविधिक परीक्षण कार्य गर्नै नसक्ने अवस्थामा सतर्कता केन्द्र पुगेको हो। सरकारले प्राविधिक परीक्षणका लागि केन्द्रलाई दिने भनिएको ५९ लाख ८१ हजार बजेट कटौती गरेको जनाइएको छ ।

तत्कालीन अर्थमन्त्री विष्णु पौडेलले विभिन्न सरकारी निकायका लागि विनियोजन गरेको बजेट कटौती गर्ने निर्णय गरेपछि राष्ट्रिय सतर्कता केन्द्रबाट हुनुपर्ने महत्वपूर्ण आयोजनाको गुणस्तर परीक्षण कार्य प्रभावित बन्न पुगेको हो । आजको नागरिक दैनिकमा समाचार प्रकाशित छ ।

२८ फागुन २०७९, आइतवार ०७:१३ बजे प्रकाशित