आर्थिक सञ्जाल २०७७ वैशाख १७ गते बुधबार

काठमाडौं । नेपालीहरुको औसत प्रतिव्यक्ति आय १ हजार ८५ अमेरिकी डलर पुगेको छ । नेपाली रुपैयाँमा यो कुल गार्हस्थ्य उत्पादन वार्षिक १ लाख २६ हजार १८ रुपैयाँ हुन आउँछ । गत आर्थिक वर्ष प्रतिव्यक्ति आय १ हजार ३४ अमेरिकी डलर थियो। जुन नेपाली रुपैयाँमा गत वर्ष १ लाख १७ हजार २६८ थियो । यसआधारमा प्रतिव्यक्ति आय वार्षिक ८ हजार ७५० रुपैयाँले बढेको देखिन्छ ।

केन्द्रीय तथ्यांक विभागले बुधबार यस्तो प्रक्षेपण सार्वजनिक गरेको हो । विभागका अनुसार चालु आर्थिक वर्ष २.२७ प्रतिशत मात्र आर्थिक वृद्धिदर हासिल हुनेछ । गत आर्थिक वर्ष ६.७५ प्रतिशत आर्थिक वृद्धिदर हासिल भएको थियो। यसैगरी, गार्हस्थ्य उत्पादन आधारभूत मूल्यमा ३२ खर्ब ९ अर्ब रहेको छ ।

यसैगरी, कुल गार्हथ्य उत्पादन उपभोक्ता मूल्यमा ३७ खर्ब ६७ अर्ब छ । कोरोना भाइरसका कारण अर्थतन्त्रका समग्र सूचकहरु ओरोलो लाग्ने क्रममा रहेका हुन् ।

 

अझ भाइरसले कतिसम्म असर गर्छ भन्ने यकिन भइसकेको छैन । यसर्थ, तथ्यांक विभागले आगामी दिनमा पनि प्राप्त तथ्यांकहरुका आधारमा थप प्रक्षेपणहरु सार्वजनिक गर्दै जाने बताएको छ । विशेषगरी रेमिटेन्स, होटल तथा रेस्टुँरा सहित समग्र पर्यटन र यातायात क्षेत्रमा कोरोनाले बेस्सरी असर पुर्याएको छ । आर्थिक गतिविधि ठप्प भएका छन् ।

विभागका अनुसार चालु आर्थिक वर्षमा प्राथमिक क्षेत्र मानिने कृषि, वन, मत्स्यपालन, खानी तथा उत्खनन् क्षेत्रको वृद्धिदर २.५ प्रतिशत हुनेछ । गत आर्थिक वर्ष जीडीपीमै महत्वपूर्ण योगदान दिन धानको उत्पादन झन्डै ९ प्रतिशतले बढेपछि यो क्षेत्रको वृद्धिदर ५.१ प्रतिशत थियो । द्वितीय क्षेत्रमा पर्ने निर्माण, उद्योग, विद्युत, ग्याँस लगायत क्षेत्रको विस्तार ‍‍३.३६ प्रतिशत हुने प्रक्षेपण गरिएको छ । गत आर्थिक वर्ष यस क्षेत्रको वृद्धि ८.१  प्रतिशत थियो ।