काठमाडौँ । सुरक्षण मुद्रण केन्द्रका तत्कालीन कार्यकारी निर्देशक विकल पौडेल र उनकी श्रीमती एलिना बस्नेत विरुद्ध जिल्ला अदालत काठमाडौँमा मुद्दा दायर भएको छ ।

अख्तियार दुरुपयोग अनुसन्धान आयोगले विदेशी विनिमय अपचलन कसुरमा पौडेल दम्पतीविरुद्ध जिल्ला अदालतमा मुद्दा दायर गरेको हो । पौडेलले गरेको अवैध विदेशी मुद्राको कारोबारमा बस्नेतको संलग्नता देखिएको अख्तियारले जनाएको छ ।

अख्तियारले पौडेलविरुद्ध ६१ करोड १३ लाख २१ हजार १ सय ५३ रुपैयाँ २० पैसा बिगो कायम गरी कानून बमोजिम ३ गुणाले हुने बिगो १ अर्ब ८३ करोड ३९ लाख ६३ हजार ४ सय ५९ रुपैयाँ समेत सजाय हुन मागदावी लिई अदालतमा मुद्दा दायर गरेको हो ।

यसै गरी बस्नेतलाई फरार कायम गरी १ करोड ५२ लाख ७० हजार ७ सय ४० रुपैयाँ बिगो कायम गरी ४ करोड ५८ लाख १२ हजार २२ रुपैयाँ सजाय हुन मागदावी लिई अदालतमा मुद्दा दर्ता गरेको अख्तियारले जनाएको छ ।

पौडेलले गैरकानूनी रूपमा नेपाल राष्ट्र बैंककको अनुमतिरस्वीकृति नलिई विदेशी बैंकमा खाता खोली रकम जम्मा गर्ने, उक्त रकम श्रीमती लगायतको नाममा विदेशी बैंकमा जम्मा गर्ने र विदेशमा रहेका बैंक खातामा विभिन्न व्यक्तिबाट रकम जम्मा भएकोरगराएको पुष्टि भएको अख्तियारले जनाएको छ ।