काठमाडौं । राजस्व अनुसन्धान विभागले ठूलो परिमाणमा मूल्य कम देखाएर वस्तु आयात गरी कर छली गरेको आरोपमा रुपन्देहीस्थित सुन्दर प्लाईउड इन्डष्ट्रिज विरुद्ध उच्च अदालत, तुलसीपुर, बुटवल इजलासमा मुद्दा दायर गरेको छ ।

बुटवल भन्सार कार्यालय मार्फत भारतबाट ल्याइएको मालसामानको वास्तविक मूल्य लुकाएर भन्सार मूल्य कम देखाई कर छली गरिएको पाइएको विभागले जनाएको छ ।

कम्पनीका प्रोप्राइटर अशोक अग्रवालले गोप्य बैंक खाताको प्रयोग र कागजातमा हेरफेर गरी नियोजित रूपमा फर्जी कारोबार मार्फत कर छली गरेको प्रमाणसहित कारवाही प्रक्रिया अगाडि बढाइएको छ ।

विभागका अनुसार करछली, जरिवाना र अन्य शीर्षकमा कुल ३९ करोड ७ लाख ५६ हजार रुपैयाँभन्दा बढी असुल गर्न माग गरिएको छ । साथै राजस्व चुहावट (अनुसन्धान तथा नियन्त्रण) ऐन, २०५२ को दफा २० (६) अनुसार कारबाहीको माग गर्दै मुद्दा दायर गरिएको हो ।

विभागले राजस्व चुहावट नियन्त्रण गर्न निरन्तर अनुगमन, अनुसन्धान र कानुनी प्रक्रिया अगाडि बढाइरहेको जनाएको छ ।