संयुक्त राज्य अमेरिकाले बिहीबार इरानमाथि हवाई आक्रमण पुनः सुरू गर्ने चेतावनी दिएको छ । तेहरानले मध्यपूर्वमा युद्ध अन्त्य गर्ने सम्झौता स्वीकार गर्न अस्वीकार गरे इरानमाथि नौसैनिक नाकाबन्दी गरिने पनि चेतावनी दिएको छ ।

पाकिस्तानको सेनाका प्रभावशाली प्रमुखले तेहरानमा इरानका शान्ति वार्ताकारहरूको भ्रमण गरेपछि यो चेतावनी आएको हो ।

पाकिस्तानी सेनाका कमाण्डर फिल्ड मार्शल असिम मुनिरले गत हप्ता पाकिस्तानमा भएको पहिलो अमेरिका-इरान बैठकमा इरानी प्रतिनिधिमण्डलको नेतृत्व गर्नुभएका इरानी संसदका सभामुख मोहम्मद बाघेर गालिबाफसँग भेट गरेको समाचार इरानको सरकारी टेलिभिजनले प्रशारण गरेको थियो ।

अमेरिकी रक्षा सचिव हेगसेथले रक्षा मन्त्रालय पेन्टागनमा आयोजित पत्रकार सम्मेलनमा भने- ‘यदि इरानले गलत निर्णय गर्छ भने अमेरिकाले नाकाबन्दी गर्नेछ र पूर्वाधार र ऊर्जा संरचनालाई ध्वस्त पार्नेछ ।’

यसैबीच, ह्वाइट हाउसकी प्रेस सेक्रेटरी क्यारोलिन लेविटले पत्रकारहरूलाई पाकिस्तानी राजधानीमा थप वार्ता हुने सम्भावना रहेको बताएकी छन् । ‘ती छलफलहरू भइरहेका छन् । हामी सम्झौताको सम्भावनाको बारेमा राम्रो महसुस गर्दछौँ’, उनले भनिन् ।

वाशिङ्टनले नयाँ वार्ताको अपेक्षा गरे पनि अमेरिकाले इरानी बन्दरगाहमाथिको नाकाबन्दी कायम राख्ने र अस्थायी युद्धविरामले दिएको दुई हप्ताको समय प्रयोग गरी आफ्ना सेनालाई पुनः शस्त्रीकरण गर्ने चेतावनी दिएको छ ।

अमेरिकी सेनाका शीर्ष अधिकारी जनरल डान केनले नौसैनिक नाकाबन्दी इरानको बन्दरगाहमा जाने वा त्यसबाट आउने सबै जहाजमा लागू हुने बताए ।

उनले भने, ‘यदि उनीहरूले यो नाकाबन्दीको पालना गरेनन् भने हामी बल प्रयोग गर्नेछौँ ।’