प्यालेस्टाइनी विद्रोही समूह हमासले बाँकी चरणमा इजरायली बन्धकको रिहाइ रोक्ने चेतावनी दिएको छ । इजरायलले गाजा युद्धविराम सम्झौता उल्लङ्घन गरेको भन्दै हमासले आउँदो चरणमा बन्धकको रिहाइ रोक्ने चेतावनी दिएको बीबीसीले जनाएको छ ।

हमासले उत्तरी गाजामा विस्थापित व्यक्तिहरुको फिर्तीमा ढिलाइ हुनु, गाजापट्टीको विभिन्न क्षेत्रमा अझै गोलाबारी हुनुलाई इजरायले सम्झौता उल्लङ्घन गरेको भनेको छ । इजरायलले सहमतिअनुसारको मानवीय सहायताको अनुमति पनि नदिएको हमासको आरोप छ ।

युद्धविरामको सम्झौता अनुरुप इजरायलमा थुनामा रहेका थप प्यालेस्टिनी कैदीहरूको बदलामा गाजामा बन्धक बनाएका तीनजनालाई गएको शनिवार रिहा गर्नुपर्ने थियो । तर प्रक्रिया अघि बढ्न सकेको छैन ।

इजरायलले भने गाजाको कुनै पनि सम्भावित परिदृष्यका लागि सेनालाई उच्च अलर्टमा राखिएको प्रतिक्रिया दिएको छ । रक्षामन्त्री इजराइल काट्जले आईडीएफलाई उच्च सतर्कता अपनाउन निर्देशन दिएको बताउनुभएको छ ।

सम्झौतायता अहिलेसम्म २१  इजरायली र पाँच सय ६६  प्यालेस्टिनी  बन्धकहरू रिहा भइसकेका छन् । हमासको कब्जामा रहेका भनिएका नेपालका विपिन जोशी अझै रिहा हुन सकेका छैनन् ।