बेलायतको लन्डनबाट अमेरिकाको टेक्सास जाँदै गरेको ब्रिटिस एअरवेजको बोइङ ७८७–९ ड्रिमलाइनर उडान ९ घण्टाको यात्रापछि त्यही ठाउँमा फर्किएको छ ।

तीन सय यात्रु बोकेर उडेको जहाजमा क्यानडाको हवाई क्षेत्रमा पुग्दा केही प्राविधिक समस्या आएपछि फेरि लन्डनको हिथ्रो विमानस्थल नै फर्काइएको द न्युयोर्क पोस्टले जनाएको छ । यात्रु सबै सकुशल रहेका छन् ।

सामान्य अवस्थामा उडानलाई लन्डनबाट टेक्सास पुग्न १० घण्टा १५ मिनेट लाग्छ । ब्रिटिस एअरवेजले विमानमा सामान्य प्राविधिक त्रुटि भएको भन्दै यसलाई मर्मत गर्ने सुविधा लन्डनको कम्पनीमा मात्र उपलब्ध भएकाले बेलायत नै फिर्ता ल्याएको जनाएको छ । ब्रिटिस एअरवेजले विज्ञप्ति निकालेर यात्रुलाई पर्न गएको असुविधाप्रति क्षमा मागेको छ ।