रुसी राष्ट्रपति भ्लादिमिर पुटिनले परमाणु ऊर्जाद्वारा सञ्चालित क्रुज मिसाइलको अन्तिम परीक्षणमा आफ्नो देशले सफलता हात पारेको दाबी गरेका छन् । यो मिसाइल परमाणु हथियार बोकेर लैजान सक्षम हुन्छ ।

आफ्ना प्रवक्ताले अमेरिकी अखबार न्युयोर्क टाइम्सको रिपोर्टलाई खण्डन गरेलगत्तै पुटिनबाट यस्तो दाबी आएको हो । रुसले बुरेवेस्तनिक नामको हतियार परीक्षण गर्न लागेको दाबीसहित न्युयोर्क टाइम्सले रिपोर्ट प्रकाशित गरेको थियो ।

यो प्रायोगिक हतियारको सुरुवाती घोषणा सन् २०१८ मा भएको थियो । यसको रेन्ज असीमित रहेको बताइन्छ ।

किन विशेष छ यो मिसाइल ?

यो मिसाइलबारे धेरै जानकारी उपलब्ध छैन । रुसले पनि यसबारे धेरै कुरा खुलाएकै छैन । अहिलेसम्म जेजति जानकारी उपलब्ध छन्, त्यसअनुसार यो मिसाइल परमाणु रिएक्टरमा आधारित छ । सजिलो शब्दमा यसको मतलव यो मिसाइलले परमाणु रिएक्टरबाट नै ऊर्जा हासिल गर्छ ।

यसका साथै यो एक क्रुजज श्रेणीको मिसाइल हो । योसँग परमाणु हतियार बोकेर लैजाने क्षमता छ । तर यसको क्षमतालाई लिएर आधिकारिक रूपमा धेरै जानकारी उपलब्ध छैन । यसअघिको परीक्षण असफल रहेको रिपोर्ट बाहिर आएको थियो ।

राष्ट्रपति पुटिनले सोची शहरमा भएको बैठकमा गरेको दाबीको स्वतन्त्र तरिकाले पुष्टि हुन सकेको छैन । रुसी रक्षा मन्त्रालयले पनि यसबारे कुनै सूचना दिएको छैन ।