काठमाडौं । सानिमा जनरल इन्स्योरेन्सको प्रस्तावित ३० करोडको आईपीओ(साधारण सेयर) पारित भएको छ । कम्पनीको दोश्रो वार्षिक साधारण सभाले सञ्चालक समितिको उक्त प्रस्तावलाई पारित गरेको छ ।
सो साधारण सभाले पारित गरेसँगै कम्पनीले हाल कायम चुक्ता पुँजीको ३० लाख कित्ता सेयर निष्काशन गर्नेछ । कम्पनीको हाल चुक्ता पुँजी ७० करोड रुपैयाँ रहेको छ । उक्त आईपीओ पश्चात कम्पनीको चुक्ता पुँजी १ अर्ब नाघ्ने छ ।
कम्पनीले नियमक निकाय बीमा समितिको निर्देशन बमोजिम १ अर्ब रुपैयाँ चुक्ता पुँजी पुरयाउनु पर्ने व्यवस्था भए अनुसार सो मात्राको सेयर निष्काशन गर्न लागेको हो ।
त्यसैगरि सभाले आगामी आर्थिक वर्ष ०७६/०७७ का लागि कम्पनीको वार्षिक लेखा परीक्षकमा एल.आर. एसोसियट्सका चाटर्ड एकाउण्टेण्ट सुजन काफ्लेलाई नियुक्त गरेको छ ।
सानिमा जनरल इन्स्योरेन्सले २०७५ असार २७ बाट आफ्नो व्यवसायिक बीमा कारोवार शुरु गरेको थियो ।