आर्थिक सञ्जाल आइतबार, ९चैत्र २०७६
काठमाडौं । कोरोना भाइरसको त्रास बढ्न थालेपछि नेपाल बैंकर्स संघको आकस्मिक बैठक बसेको छ । बैठकले बैंकहरुलाई ‘एड्भाइजरी’ जारी गर्दै ‘ब्याक अफिस’ का कर्मचारीलाई घरबाटै काम गर्ने व्यवस्था मिलाउन सुझाव दिएको छ । साथै, माथिल्ला तहका कर्मचारीलाई पनि आवश्यक व्यवस्थापन मिलाएरु बिदा दिन सुझाव दिएको छ । ब्याक अफिसमा बस्दा पनि कार्यालय नआई नहुने कर्मचारीलाई सिफ्टमा काम लगाउने निर्णय गरेको छ ।
ग्राहकसँग प्रत्यक्ष सम्पर्कमा बसेर काम गर्ने कर्मचारीका लागि स्यानिटाइजर र मास्क अनिवार्य गरिएको छ । घरबाट काम गर्न मिल्ने कर्मचारीलाई घरमै बसेर काम गर्ने सुझाव दिएको छ ।

सरकारले २५ जनाभन्दा बढी एकै ठाउँमा भेला नहुने निर्देशन दिइसकेको छ । यो सँगै संघले पनि बैंकमा एकै समयमा २५ जनाभन्दा बढी ग्राहक छिर्नमा रोक लगाउने निर्णय गरेको हो । संघले कार्यालय प्रवेश गर्नुअघि ग्राहकलाई स्यानिटाइजरको अनिवार्य प्रयोग गर्न लगाउने निर्णय पनि गरेको छ ।

संघले प्रमुख कार्यकारी अधिकृत (सीइओ), डेपुटी सीइओ, ब्यवस्थापनका अन्य उच्च कर्मचारीहरु एउटै भवनमा बसेर काम गर्न नपाउने निर्णय गरेको छ । संघले उच्च तहका कर्मचारी एकै ठाउँमा हुँदा एकै पटक संक्रमित हुन सक्ने भन्दै सावधानीका लागि छुट्टाछुट्टै भवनमा बसेर काम गर्न सुझाव दिएको हो । यद्दपि, यो मध्ये महत्वपूर्ण निर्णयहरु बैंकहरुको सञ्चालक समितिको बैठक बसेपछि मात्रै टुंगो लाग्ने एक बैंकर्सले बताए ।