काठमाडौं । पछिल्लो समय अधिकांश बैंक तथा वित्तीय संस्थाहरू डिजिटल बैंकिङ प्रक्रियामा अघि बढ्न थालेका छन् । बैंकमात्र नभएर डिजिटल बैंकिङ रुचाउनेको जमात पनि बढ्दो छ ।

हो, त्यस्तै डिजिटल बैंकिङ रुचाउनेहरुका लागि निकै उपयोगी हुन सक्छ, नबिलको ‘एन बैंक’ । नबिल बैंक लिमिटेडले आफ्ना ग्राहकलाई अनलाइनबाटै खाता खोलेर ऋण समेत दिने गरी नेपालमा पहिलो पटक सन् २०२२ मा ‘एन बैंक’ सञ्चालनमा ल्याइएको हो ।

यो मोबाइल बैंकिङको पूर्ण परिमार्जित रूप हो । ‘एन बैंक’ कुनै पनि भौतिक शाखा बिनाको निजीकृत भर्चुअल बैंकिङ हो । यसलाई नबिल बैंकले एक छुट्टै भर्चुअल शाखाको रूपमा स्थापना गरेको छ ।

जसबाट  ग्राहकहरूले जुनसुकै समय र स्थानबाट पनि डिजिटल बैंकिङ सेवाहरू प्राप्त गर्न सक्नेछन् । निओ बैंकिङ अवधारणामा बैंकले यो एप सञ्चालनमा ल्याएको बताइएको छ । समय र लागत खपत गर्न प्रायः मानिसहरुले एन बैंकको प्रयोग गर्ने गरेका छन् ।

ग्राहकले आफ्नो साथमा रहेको मोबाइल फोनको सहायताले ‘एन बैंक’को उपयोग मार्फत खाता खोल्ने, निक्षेप राख्ने, भुक्तानी लिने, ऋण लिने जस्ता सबै परम्परागत बैंकिङ सेवाहरू सजिलैसँग लिन सक्नेछन् ।

के हो ‘एन बैंक’ ?

‘एन बैंक’ खाता भने होइन, यो एउटा एप हो । नबिल स्मार्ट बैंक एप प्रयोग गरिरहेका ग्राहकहरूले त्यसलाई नै अपडेट गर्दा यो प्राप्त हुन्छ । पहिले लोगोमा भएको ‘ए’ भने एन बैंकमा ‘एन’मा परिणत हुन्छ ।

नयाँ र आधुनिक प्रयोगकर्तालाई इन्टरफेस प्रदान गर्न पहिलेको एपको लुक एन्ड फिल अपडेट गरिएको छ । नबिल बैंकमा खाता नखोलेका ग्राहकले पनि अब आफ्नो मोबाइलमा रहेको ‘एन बैंक’ एपबाट बैंक खाता खोल्न सक्नेछन् ।

‘एन बैंक’मार्फत् खाता खोल्न जम्मा ३० सेकेन्ड लाग्नेछ । यसमा २४ सै घण्टा कस्टुमर केयर सपोर्ट रहेको छ । यसका साथै २४ सै घण्टा भिडियो केवाईसीको सुविधा समेत उपलब्ध रहेको छ ।

एन सेभिङ खाता खोल्न ग्राहकले आफ्नो नाम, जन्म मिति, इमेल ठेगाना, मोबाइल नम्बर र नागरिकता नम्बर मात्र भर्नुपर्ने हुन्छ ।

खोलिएको खाता ग्राहकहरूले आफ्नो केवाइसी अद्यावधिक गर्नुभन्दा पहिले १५ दिनका लागि सञ्चालन हुनेछ । केवाइसी अद्यावधिक पनि त्यही एपबाट नै गर्न सकिनेछ । कुनै डकुमेन्ट मिलेन भने इमेल मार्फत बैंकले जानकारी गराउनेछ ।

सच्याउने काम पनि ग्राहकहरूले आफ्नो ‘एन बैंक’ एपबाट सिधै गर्न सक्नेछन् । ‘एन बैंक’को कुनै सेवा प्रयोग गर्दा आउन सक्ने समस्यालाई तुरुन्तै समाधान गर्ने मनसायले यो सुविधा सञ्चालन गरिएको छ । नयाँ डेबिट कार्ड, डेबिट कार्ड प्रतिस्थापन, क्रेडिट कार्ड, व्यक्तिगत ऋण लगायत सेवाहरू समेत सो एपबाट लिन सकिन्छ ।

‘एन बैंक’ कति सुरक्षित ?

हुन त, डिजिटल बैंकीङ प्रयोगकर्ताहरूमा एक प्रकारका डर सधैँ रहने गर्दछ । त्यसैले डिजिटल बैंकिङको कुरा गरिरहँदा ग्राहकको पैसा कति सुरक्षित रहन सक्छ भन्ने प्रमुख विषय रहन्छ ।

‘एन बैंक’ छुट्टै जस्तो देखिए पनि खाता खोलिसकेपछि ती ग्राहक नबिल बैंकका ग्राहक नै हुनेछन् । यो खातामा पैसा राख्दा डराउनु नपर्ने बैंकको दाबी छ ।

भौतिक खातामा झैँ ग्राहकको पैसा नबिल बैंकमा सुरक्षित नै रहन्छ । यसका लागि बैंकले बलियो ओटीपी पासवर्ड राखेको छ ।

जसमा ग्राहकले रजिष्टर गर्दा ग्राहककै मोबाइल र नम्बर हुन पर्छ । रजिष्टर गर्दा बैंकले टू फ्याक्टर अथोरिटी पठाउँछ साथै, सीम भेरिफिकेसन पनि गर्छ । जसको कारण स्वयं व्यक्तिको भन्दा अन्य व्यक्तिले अर्को मोबाइलमा लगइन गर्न सक्दैनन् ।

‘एन बैंक’मा खाता नखोले पनि पाइन्छ यी सुविधा

‘एन बैंक’मा खाता नखोलेका सर्वसाधारणहरूले पनि विभिन्न किसिममा फाइदा उठाउन सक्नेछन् । ‘एन बैंक’ एपबाट कुनै पनि व्यक्तिले बिल भुक्तानी लगायतको काम गर्न सक्नेछन् ।

‘एन बैंक’ निःशुल्क प्रयोग गर्न पाइने

यो एप प्रयोग गर्दा पैसा लाग्दैन । यसको नवीकरणको लागि वार्षिकरुपमा तीन सय रुपैयाँ भने ग्राहकले तिर्नुपर्ने हुन्छ । कारोबार गर्दा सूचना प्रवाह गर्न एसएमएस मार्फत सूचनाहरू पठाउनुपर्ने भएकोले उक्त चार्ज लिइएको बैंकको भनाइ छ ।

‘एन बैंक’मार्फत् ग्राहकले तीन प्रकारका लोनहरू पाउनेछन् । जसमा फोन लोन, फिक्स डिपोजिट नबिलमा छ भने ९० प्रतिशत लोन पाइन्छ र क्रेडिट कार्ड पनि आवश्यक डकुमेन्ट बुझाएर एक हप्ता भित्रमा कर्जा पाउन सकिनेछ ।

हालसम्म १० लाखभन्दा बढी प्रयोगकर्ताले एन बैंक डाउनलोड गरिसकेको बैंकले जनाएको छ ।