अमेरिकी खाद्य तथा औषधि प्रशासन (एफडीए) ले भारतमा बनेको आँखाको ड्रप प्रयोग नगर्न चेतावनी दिएको छ। समाचार एजेन्सी रोयटर्सका अनुसार अमेरिकामा संक्रमण, अन्धोपन र अन्य जटिलता भएका कम्तीमा ५५ जनामा ​​यो ड्रप जिम्मेवार छ र एक जनाको मृत्युसमेत भएको छ।

एफडीएले बिहीबार भारतको ग्लोबल फार्मा हेल्थकेयर प्रालिले उत्पादन गरेको आर्टिफिसियल टियर्स आई ड्रपले ब्याक्टेरियाको संक्रमण हुने र कम्पनीले उत्पादन मापदण्डको उल्लंघन गरेको बताएको छ।

चेन्नईस्थित कम्पनी ग्लोबल फार्मा हेल्थकेयरले बुधबार संयुक्त राज्य अमेरिकामा उपभोक्ता स्तरमा आँखा ड्रपको बाँकी स्टकको बारेमा स्वैच्छिक फिर्ता बोलाएको छ। एज्रिकेयर एलएलसी र डेलसाम फार्माले संयुक्त राज्यमा यो आईड्रप वितरण गर्दछन् ।

एक भारतीय सरकारी स्रोतले रोयटर्सलाई भने कि केन्द्रीय र राज्य औषधि नियामकहरूले ग्लोबल फार्मा हेल्थकेयरको चेन्नई प्लान्टमा टोली पठाएको छ। गत वर्ष गाम्बियामा यस्तै एउटा भारतीय कफ सिरपबाट ७० बालबालिकाको मृत्यु भएको थियो ।