काठमाडौं । शिक्षा, विज्ञान तथा प्रविधिमन्त्री गिरिराजमणि पोखरेललाई सामाजिक दूरी कायम गरेर विद्यार्थी भर्ना प्रक्रिया सुरु गर्न सुझाव दिइएको छ । मन्त्री पोखरेललाई राष्ट्रिय परीक्षा बोर्डका अध्यक्ष तथा परीक्षा सम्बन्धी सुझाव समितिका संयोजक डा. चन्द्रमणि पौडेलले सामाजिक दूरी कायम गरेर विद्यार्थी भर्ना सुरु गर्न सुझाव प्रतिवेदन पेश गरेका हुन् ।

प्रतिवेदनमा यही वैशाख २५ गतेभित्र १ देखि ९ कक्षासम्मको नतिजा प्रकाशन गर्ने, २५ गतेपछि सामाजिक दूरी कायम गर्दै भीडभाड नहुने गरी भर्ना प्रकिया अगाडि बढाउन भनिएको छ ।

यसैगरी, विद्यार्थीले आफ्नो घरबाट खाना खाएर परीक्षा दिन जान सक्ने गरी परीक्षा केन्द्र निर्धारण गर्न सुझाव दिइएको छ । उक्त सुझावलाई मन्त्री पोखरेलले उच्चस्तरीय समिति र मन्त्रिपरिषद् बैठकमा लैजाने बताएका छन् ।  रासस