बजाज अटोले आफ्नो लेजेन्ड्री र निकै लोकप्रिय मोटरसाइकल पल्सर २२० एफलाई लामो समयदेखि प्रतिक्षा गरिएको एउटा ठूलो फिचरका साथ बजारमा उतारेको छ । कम्पनीले यस बाइकमा अब नयाँ एलईडी हेडलाइट थपेको छ, जसले गर्दा यो क्लासिक बाइक प्रेमीहरूका लागि अझ बढी आकर्षक बनेको छ ।

यसअघि डिसेम्बर २०२५ मा बजाजले यो मोडलमा नयाँ ग्राफिक्स, एलईडी इन्डिकेटर र नयाँ कलर स्किमहरू सहितको अपडेट गरेको थियो ।

यो अपडेटको सबैभन्दा ठूलो परिवर्तन भनेकै यसको लाइटिङ सेटअप हो । बाइकमा रहेको पुरानो हेलोजन हेडलाइटलाई पूर्ण रूपमा हटाएर इन्टीग्रेटेड एलईडी डेटाइम रनिङ ल्याम्प्स (डीआरएलएस) सहितको नयाँ एलईडी हेडलाइट युनिट राखिएको छ ।

नयाँ लाइटिङ सिस्टमलाई पल्सर २२०एफको सदाबहार र परिचित ’सेमी–फेयर्ड’ फ्रन्ट एन्डभित्रै फिट गरिएको छ । बाइकको बाँकी बडीवर्क र यसको चर्चित ‘सिल्हूट’ लाई कम्पनीले कुनै परिवर्तन नगरी यथावत् राखेको छ ।

भरपर्दो र शक्तिशाली लुक्समा अपग्रेड गरिए पनि मेकानिकल रूपमा भने बाइकमा कुनै परिवर्तन गरिएको छैन । यसमा पहिलेकै २२० सीसी सिंगल–सिलिन्डर, आयल–कुल्डयुक्त शक्तिशाली र भरपर्दो इन्जिन प्रयोग गरिएको छ ।

नयाँ एलईडी अपग्रेडसँगै पल्सर २२०एफ को मूल्य समेत बढेको छ । अब यसको मूल्य १ लाख ३६ हजार भारु पुगेको छ । डिसेम्बरको अपडेटपछि यसको मूल्य १ लाख २८ हजार रुपैयाँ रहेकोमा अहिले यसमा ८ हजार भारु वृद्धि भएको हो ।

बजाजको पोर्टफोलियोमा सबैभन्दा पुरानो र सफल मध्येको एक पल्सर २२० एफले बजारमा नयाँ र आधुनिक बाइकहरूको तीव्र प्रतिस्पर्धाका बावजुद पनि आफ्ना ’कट्टर प्रशंसक’हरूको मन जितिरहेको छ ।

यसैबीच, बजाजले आफ्नो ‘क्लासिक पल्सर’ रेन्जलाई पूर्ण रूपमा रिफ्रेस गर्ने तयारी गरिरहेको छ । हालै मात्र अर्को पुस्ताको पल्सर १२५ भारतीय सडकहरूमा टेस्टिङको क्रममा देखिएको छ । यो नयाँ सिरिज पूर्ण रूपमा नयाँ प्लेटफर्म, परिमार्जित चेसिस र नयाँ सस्पेन्सन परिवर्तनका साथ आउने अपेक्षा गरिएको छ ।

पल्सर २२० एफ नेपाली बजारमा समेत बिक्री हुँदै आएको एक लोकप्रिय मोडल हो । नेपालमा हाल यसको बीएस४ र बीएस६ दुवै भर्सन उपलब्ध छन् ।

जसको मूल्य क्रमशः ४ लाख २० हजार र ४ लाख ४० हजार रुपैयाँ पर्छ । भारततीय बजारमा भएको मूल्य बृद्धिको असर नेपाली बजारमा समेत पर्ने हुँदा यसको अपडेटेड मोडल नेपाल आइपुग्दा २५ हजार रुपैयाँसम्मले महंगो पर्ने अनुमान गर्न सकिन्छ ।