काठमाडौं । आफ्नै कीर्तिमानी तोड्दै विश्वको सर्वोच्च शिखर सगरमाथामा सबैभन्दा धेरैपटक सफल आरोहण गरी विश्वकीर्तिमानी बनाएका आरोही कामीरिता शेर्पाले पुनः २९औं पटक सगरमाथाको सफल आरोहण गरेका छन् ।

स्वदेशी विश्वकीर्तिमानी आरोही शेर्पाले आइतबार बिहान ७ बजेर २५ मिनेटमा सगरमाथाको शिखर चुमेर २९ औं पटकको नयाँ रेकड राख्न सफल भएका हुन् । यो सफलतासँगै ५४ वर्षीय आरोही कामीरिताले यसअघिको आफ्नै विश्वकीर्तिमानी तोड्नै पुनः नयाँ रेकर्ड बनाएकी हुन् ।

उनी सेभेन समिट ट्रेक्स प्रालिबाट सगरमाथा आरोहणमा गएका थिए । अहिलेसम्म विश्वको सर्बोच्च शिखर सगरमाथा हिमालको सबैभन्दा धेरैपटक सफल आरोहण गर्ने व्यक्तिमा कामीरिताले थप नयाँ रेकर्ड बनाएको सेभेन समिट ट्रेकिङ कम्पनीले जनाएको छ ।

सोलुखुम्बुको थामेका कीर्तिमानी आरोही शेर्पाले सन् १९९२ देखि हिमाल आरोहण सुरु गरेका थिए । सगरमाथा हिमाल आरोहणको यस सफलतासँगै यसअघि उनले ८ हजार मिटर अग्ला केटु, चोयु, ल्होत्से, मनास्लु हिमालको पनि सफल आरोहण गरिसकेका छन् ।

विश्वको सबैभन्दा अग्लो शिखर सगरमाथामा धेरै पटक सफल आरोहण गरिसकेका विश्वप्रख्यात आरोही शेर्पाले यसअघिको आफ्नै २८औं कीर्तिमानलाई तोडेर आइतबार नयाँ रेकर्ड कायम गरेका हुन् । यसपालि पनि उनले सेभेन समिट ट्रेक्स प्रालिमार्फत सगरमाथा आरोहण गरेका थिए ।

सेभेन समिट ट्रेक्सका अध्यक्ष मिङ्मा शेर्पाले आइतबार बिहान ७ बजेर २५ मिनेटमा कामीरिता सगरमाथाको शिखरमा पुगेको जानकारी दिए ।

आरोही कामीरिताले पहिलोपटक सन् १९९२/ १९९३ मा सगरमाथा आरोहण गरेका थिए । तर, त्यो बेला शिखर चुम्न सकेनन् । त्यस बेला आधार शिविरभन्दा माथिको बीच बाटोबाटै फर्किएका शेर्पाले २४ वर्षको उमेरमा सन् १९९४ मा पहिलोपटक सगरमाथाको शिखर चुमेका थिए ।

त्यसपछि सगरमाथा हिमालको चुचुरोसम्म डोरी टाँग्ने जिम्मेवारी पनि पाएकाले उनले सन् २००९, २०१० र २०१३ मा एकै मौमसमा दुईपटक सगरमाथा चढेका थिए ।

सन् २०१८ बाट उनले सेभेन समिटमा काम सुरु गरेका हुन् । जीवनको आधा उमेर हिमाली क्षेत्रमै बिताएका कीर्तिमानी आरोही शेर्पाले सगरमाथा आरोहणको ५०औं वर्षगाँठका बेला पनि आफूले २५औं पटक सगरमाथा चढेको रजत वर्षका रूपमा विश्राम लिने भनेका थिए । त्यसपछि पनि उनलाई हिमाल आरोहणको मोहले छोडेन ।

फेरि एकपछि अर्को कीर्तिमानी तोड्दै अहिले २९औं पटक सगरमाथा आरोहण गर्ने विश्व कीर्तिमानी भइछाडे । उनलाई हिमाल नचढी चित्तै बुझेन र अहिले लगातार आफ्नै कीर्तिमानी तोड्दै २९औं पटकसम्म सगरमाथाको शिखर चुम्न सफल भए ।

पर्यटन विभागले जानकारी गराए अनुसार, कामीरिता विदेशी भीभीआईपी समूहको वरिष्ठ हाई अल्ट्च्युड गाइडका रूपमा यसपालि २९औं पटक सगरमाथा आरोहण गर्न गएका थिए ।

यसपालि सेभेन समिट र फोर्टिन पिक्स एक्सपिडसन गरी दुईवटा कम्पनीका सदस्यलाई सगरमाथा आरोहण गराउने जिम्मेवारी उनको छ ।

यसैबीच, यो सिजनमा आरोहीलाई सगरमाथा शिखरसम्म पुग्ने बाटो बनाउने प्राविधिक टिमलाई आधार शिविरमा सरकारले सम्मान गरेको छ ।

यसपालिको वसन्त ऋतुको जारी आरोहण सिजनका लागि गत शुक्रबार आइसफल डाक्टरको समूहले बाटो बनाउने काम सम्पन्न गरेको थियो । सोहीअनुसार आइतबार बिहानैदेखि यस वर्षको सगरमाथा आरोहण गर्नेक्रम सुरु भइसकेको छ ।

पर्यटन विभागका अनुसार आधार शिविरबाट दोस्रो शिविरसम्म सगरमाथा प्रदूषण नियन्त्रण समिति र दोस्रो आधार शिविरदेखि चुचुरोसम्म बाटो बनाउने कामको जिम्मेवारी पर्वतारोहण सञ्चालक संघले पाएको थियो ।

सो संघबाट छनोट भएको सेभेन समिट प्रालिले सगरमाथा चुचुरोसम्म बाटो बनाएको हो । आइतबार आधार शिविरमा दुवै बाटो बनाउने संस्था र सोही संस्थाबाट खटिएका आइसफल डाक्टरलाई सरकारले सम्मान गरेको हो ।

यस वर्षको आरोहणलाई व्यवस्थित गर्न सरकारले सगरमाथा आधार शिविरमा फिल्ड अनुगमन तथा निरिक्षण कार्यालय स्थापना गरेको छ । आरोहणका लागि बाटो बनाउने काममा सार्की शेर्पा र डेन्डी शेर्पाको टोली खटिएको थियो ।