एलिएन्ज एरिना म्युनिखमा मंगलबार राति भएको खेलमा फ्रेइवर्गका निकोलस होफलेर र लुकास होलेरले गोल गर्दा बायर्नका डेअट उपमेकानोको गोल सान्त्वना बन्यो ।

खेलको २०औं मिनेटमा डेअट उपमेकानोको गोलबाट बायर्नले सुरुवाती अग्रता सलन सफल भएको थियो । तर त्यो अग्रतालाई बायर्नले जोगाउन नसक्दा पराजित हुँदै बाहिरिन पुग्यो । २७औं मिनेटमा निकोलस होफलेरले गोल गर्दै खेललाई १–१ गोलको बराबरीमा ल्याए ।

अतिरिक्त समयतर्फ लम्किरहेको खेलको इन्ज्युरी समयको थप गरिएको पाँचौं मिनेटमा लुकासले पेनाल्टीमा गोल गर्दै फ्रेइवर्गलाई सेमिफाइनलको यात्रा तय गराए । जमल मुसिएलाले पेनाल्टी बक्समा होफलेरलाई फउलसँगै ब्लक गरेपछि रेफ्रीले फ्रेइवर्गलाई पेनाल्टी प्रदान गर्दा लुकास चुकेनन् ।

अर्को क्वाटरफाइनलमा फ्रान्कफुर्टले युनियन बर्लिनलाई २–० ले पराजित गरी सेमिफाइनलमा पुगेको छ । फ्रान्कफुर्टको जितमा दुवै गोल रान्दल कोलो मुएनीले गरे ।

अर्को क्वाटरफाइनलमा नर्नवर्ग र भिएफवी स्टुटगार्ट तथा आरबी लाइप्जिग र बोरुसिया डर्टमुन्डबीच प्रतिस्पर्धा हुँदैछ ।