काठमाडौं । प्रकाश बुढाथोकीको निर्णायक गोलमा धरान फुटबल क्लवले आहारारा पोखरा गोल्डकपको २२ औं संस्करणकमा विजयी शुरुवात गरेको छ ।

बिहीबार पोखरा रंगशालामा भएको उद्घाटन खेलमा आयोजक सहारा क्लबलाई १–० गोल अन्तरले पराजित गर्दै सुखद् शुरुवात गर्दा धरानले १२ वर्षपछि पोखरा रंगशालामा जित निकाल्न सफल भएको हो ।

धरानलाई जित दिलाउन  प्रकाशले  खेलको पाँचौँ मिनेटमा फ्रिकिकमार्फत उत्कृष्ट गोल गरेका थिए । यस जितसँगै धरानले क्वाटरफाइनलमा स्थान सुरक्षित गरेको छ ।

धरानले शनिबार हुने क्वार्टरफाइनलमा साविकको विजेता नेपाल एपिएफ क्लबकोसँग प्रतिष्पर्धा गर्ने छ ।

खेलको चौथो मिनेटमा धरान फुटबल क्लबले पाएको फ्रिकिक अवसरलाई नै गोलमा परिणत भएपछि धरानले सहारा क्लबमाथि ऐतिहासिक जित दर्ता गर्‍यो । सहाराका भावगत चौधरीले डिबक्सबाहिर फउल गरेपछि धरानले फ्रिकिकको अवसर प्राप्त गर्‍यो ।

चौधरीले प्रकाश बुढाथोकीलाई लडाएपछि पाएको फ्रिकिकमा बुढाथोकीले नै गोल गरेका हुन् । गोल्डकपको दोस्रो दिन पुस १५ गते शुक्रबार नेपाल पुलिस क्लब र चर्च ब्वाईजबीच प्रतिष्पर्धा हुने छ ।