आर्थिक सञ्जाल वैशाख ५, २०७७ शुक्रबार

काठमाडौं । उपत्यकाका दुई ठूला नगरपालिकाका मेयरले स्थानीय सरकारको हैसियतले विकास बजेट काटेर भए पनि कोरोना महामारीका लागि सहयोग गर्ने बताएका छन् ।

पछिल्लो समय राहत बाँड्न व्यस्त काठमाडौं तथा ललितपुर महानगरपालिकाले आफ्ना विकासका बजेट काटेर भए पनि स्थानियका लागि सहयोग गर्ने बताएका छन् ।

काठमाडौैं महानगरपालिकाका मेयर विद्यासुन्दर शाक्यले स्वास्थ्यभन्दा अरु ठूलो नहुने भएकाले सबै बजेट काटेर भए पनि महानगरबासीको स्वास्थ्यका लागि सक्दो सहयोग गर्ने बताउनुभयो । शाक्यले भन्नुभयो– ‘अहिले बजेटको कुरा नगरौं, पहिला महामारीबाट बचौं अनि अन्य काम गरौंला ।’

ललितपुर महानगरका मेयर चिरिबाबु महर्जनले भाडामा बसेका र खान नपुग्नेलाई राहत वितरण गरिसकेको जानकारी दिँदै भन्नुभयो– ‘विकास र अन्य भैपरी आउने बजेट व्यवस्थापन गरेर भए पनि राहत उपलब्ध गराइरहेका छौं ।’ महर्जनले यस्तो विषम परिस्थितिमा जनतालाई राहत दिनु स्थानीय सरकारको पहिलो कर्तव्य भएको बताउनुभयो । उहाँले भन्नुभयो– ‘पहिले राहतको काम गर्नेछौं, त्यसपछि बजेटको बारेमा सोचौंला ।’

काठमाडौं महानगरपालिकाले सबै वडालाई राहत रकम वितरण गरिसकेको छ । कामपाले राहत वितरण गर्न ठूला वडालाई ४, मझौलालाई ३ र सानालाई २ लाख रुपियाँ उपलब्ध गराइसकेको छ । सबै वडालाई दुई पटक रकम निकासा गरिसकेको बताउँदै मेयर शाक्यले भन्नुभयो– ‘अब तथ्यांक संकलन गरी तेस्रो चरणको राहत बाँड्नेछौं ।’

कामपाले दोस्रो चरणको राहतको विषयमा छलफल गरेर पछि मात्रै तेस्रो चरणको राहत वितरण गर्ने तयारी गरेको छ ।
ललितपुर महानगरले पनि पहिलो र दोस्रो चरणको राहत वितरण गरिसकेको जनाएको छ ।

महानगरका मेयर चिरिबाबु महर्जनले भाडामा बसेका र खान नपुग्नेलाई राहत वितरण गरिसकेको जानकारी दिनुभयो ।

उहाँका अनुसार ललितपुर महानगरपालिकाले विभिन्न शीर्षकको बजेट कटौती गरी राहत व्यवस्थापन गरेको हो । ललितपुरले दुई वर्षदेखि महानगरको राहत कोषमा जम्मा भएका १ करोड, वडाको आपत्कालीन कोषको केही र अन्य बजेटबाट तान्ने गरी ४ करोड गरी ५ करोड रुपियाँ कोरोना नियन्त्रणका लागि व्यवस्थापन गरेको छ ।

मेयर महर्जनले पहिलो र दोस्रो चरणको राहत वितरण गर्दा साल्ट ट्रेड्रिङ कर्पोरेशनसँग सम्झौता गरी वितरण गरेको बताउनुभयो । आवश्यकताको आधारमा साल्ट ट्रेडिङले सामग्री उपलब्ध गराउने र सोको आधारमा बजेज व्यवस्थापन गर्ने काम भइरहेको मेयर महर्जनको भनाइ छ ।

काठमाडौं महानगरपालिकाले मेयर उज्यालो कार्यक्रम अन्तर्गत ५ करोड र महानगर विशेष कोषको ५ करोड रुपियाँ निकासा गरी राहत वितरण, सडक, अस्पताल लगायत स्थानको सफाइ गरिरहेको छ ।

कामपाले काठमाडौंमा कोरोना संक्रमित देखिनासाथ अस्पताल, भीडभाड हुने स्थान, मन्दिर र सडकमा औषधीजन्य पानीले सफा गरिसकेको थियो । ललितपुर महानगरले पनि सबै वडाका सडक र अस्पताल सफा गरेको थियो । यो समाचार आजको नेपाल समाचारपत्र दैनिकमा ईश्वरराज ढकालले लेखेका छन् ।