आर्थिक सञ्जाल चैत्र २४, २०७६ सोमबार

काठमाडौं । अर्थमन्त्री डा. युवराज खतिवडाको संयोजकत्वमा गठिन गभर्नर छनोट समितिले आगामी कार्यकालका लागि गभर्नरमा  तीन जनाको नाम सिफारिस गरेको छ ।

अर्थमन्त्री डा.  खतिवडाको गभर्नर सिफारिस समितिले  सम्भावित गभर्नरका लागि हाल नेपाल राष्ट्र बैंकका कायमुकाय गभर्नर  चिन्तामणि शिवाकोटी, लगानी बोर्डका प्रमुख कार्यकारी अधिकृत महाप्रसाद अधिकारी र पूर्व सचिव राजन खनालको नाम सिफारिस भएको हो ।

अर्थमन्त्री डा. खतिवडाको अध्यक्षमा गठित गभर्नर सिफारिस समितिमा नेपाल राष्ट्र बैंकका पूर्व गभर्नर विजयनाथ भट्टराई र नेपाल सरकारका पूर्व अर्थ सचिव कृष्णहरि बाँस्कोटा रहेका छन् ।

समितिले गभर्नरका लागि सिफारिस गर्दा आर्थिक, मौद्रिक, बैंकिङ, वित्तीय, वाणिज्य, व्यवस्थापन तथा वाणिज्य कानुन क्षेत्रको लब्ध प्रतिष्ठित ब्यक्तिहरू मध्येबाट दुई जना छान्नु पर्ने छ भने एक जना राष्ट्र बैंकका डेपुटी गभर्नर मध्येबाट छान्नुपर्ने कानुनी ब्यवस्था रहेको छ ।

त्यसै अनुसार समितिले राष्ट्र बैंकको १७ औं गभर्नरका तीन जनाको नाम सिफारिस गरेको हो । अब यि तिनमध्ये बाट एक जना गभर्नर बन्ने छन् । ती तीनै जनाको नाम मध्येबाट मन्त्रिपरिषद्ले १ जनालाई गभर्नर नियुक्त गर्ने व्यवस्था रहेको छ । मन्त्रीपरिषद्को आज बस्ने बैठकले सम्भवत आजै राष्ट्र बैंकको गभर्नर नियुक्त गर्ने बुझिएको छ ।