काठमाडौं । नेशनल लाइफ इन्स्योरेन्स कम्पनीको जीवन बीमा कोष खर्ब नाघेको छ । नेशनल लाइफको इतिहासमा पहिलो पटक एक खर्ब ५१ करोड ३७ लाख चार हजार ४६० रुपैयाँको शक्तिशाली जीवन बीमा कोष बनाउन सफल भएको हो । अघिल्लो बर्ष कम्पनीको जीवन बीमा कोषमा ८१ अर्ब रुपैयाँ संचिती रहेको थियो ।

योसँगै नेशनल लाइफ खर्ब क्लवमा प्रवेश गर्ने तेस्रो कम्पनी बन्न सफल भएको छ । यसअघि नेपाल लाइफ र एआईसी नेपालले जीवन बीमा कोष खर्बमाथि पुर्याइसकेका छन् ।

कम्पनीले चालु आर्थिक वर्षको तेस्रो त्रैमासिक वित्तीय विवरण सार्वजनिक गरेको छ । विवरण अनुसार कम्पनीको मुनाफा सामान्य अंकले बढेर ४१ करोड ६६ लाख पुगेको छ । अघिल्लो बर्ष ४० करोड रुपैयाँ मुनाफा आर्जन गरेको कम्पनीले चालु आवमा सामान्य बृद्धि गर्न सफल भएको छ ।

समीक्षा अवधीमा कम्पनीको खुद आय २१ अर्ब १२ करोड रुपैयाँ रहेको छ । अघिल्लो आर्थिक वर्षमा यस्तो आय १९ अर्ब रहेको थियो । त्यस्तै कम्पनीले समीक्षा अवधीमा २० अर्ब रुपैयाँ खर्च गरेको छ । जुन गत आर्थिक वर्षको तुलनामा केही बढी हो । गत आवमा कम्पनीले १८ अर्ब ३२ करोड रुपैयाँ खर्च गरेको थियो ।