काठमाडौं । झाडापखाला विरुद्धको ‘रोटा खोप’ नेपालमा पहिलो पटक  सुरु गरिने भएको छ । बच्चा जन्मेको ६ सातामा पहिलो मात्रा र १० सातामा दोस्रो मात्रा दिइने गरी यही असार महिनादेखि नै सो खोप दिन लागिएको हो ।

स्वास्थ्य सेवा विभाग, परिवार कल्याण महाशाखा अन्तर्गत बाल स्वास्थ्य तथा खोप सेवा शाखाका प्रमुख डा. झलक शर्मा गौतमका अनुसार नियमित खोप अभियान अन्तर्गत रोटा खोप दिइनेछ ।

‘यो खोप ‘रोटा खोप’ बच्चाहरूलाई मुखबाट दिइन्छ डा. गौतमले भने,। केन्द्रीय स्टोरबाट खोपहरू  प्रदेशमा पठाइ सकिएको छ । प्रदेशले जिल्लामा पठाउँछ । केही दिनमै खोप दिइने तयारी छ ।’

चिकित्सकका अनुसार पाँच वर्षमुनिका बालबालिकामा देखिने झाडापखालाको प्रमुख कारणमध्ये रोटा भाइरस एक हो । सरकारले   पाँच वर्षमुनिका देशभरका सम्पूर्ण बालबालिकालाई खोपको पहुँचमा ल्याउन र नयाँ रोग विरुद्धको खोप उपलब्ध गराउने उद्देश्यले रोटा भाइरस विरुद्धको खोपलाई नियमित अभियान अन्तर्गत अघि सारेको थियो ।

नियमित रूपमा ११ वटा रोग विरुद्ध निःशुल्क खोप दिइँदै आएकामा अब रोटा भाइरसबाट हुने पखाला विरुद्धको खोप थप गरिएको बाल स्वास्थ्य तथा खोप सेवा शाखाका प्रमुख डा. गौतमले बताए।,