काठमाडौं । नेपाल वायुसेवा निगम (नेपाल एयरलाइन्स) को महाप्रबन्धक पदमा १० जना उम्मेदवारलाई कार्ययोजना प्रस्तुतीकरण र अन्तर्वार्ताका लागि छानिएको छ ।

कुल १६ जनाको आवेदन परेकोमा नेपाल वायुसेवा निगम महाप्रबन्धक छनोट कार्यविधि २०८२ बमोजिम रीतपूर्वक आवेदन दिने १० जनाको नाम कार्ययोजना प्रस्तुतीकरण र अन्तर्वार्ताका लागि छानिएको संस्कृति, पर्यटन तथा नागरिक उड्डयन मन्त्रालयले जानकारी दिएको छ ।

मन्त्रालयका अनुसार यो सूचीमा निगममै कार्यरत वरिष्ठ पाइलट दिपु ज्वार्चन र टंकनिधि दाहालसहित उपेन्द्रबहादुर कार्की, डा. दीपकप्रसाद बास्तोला, डा. भीमबहादुर चन्द, योगराज कँडेल, विष्णुबाबु मिश्र, बेदप्रसाद उप्रेती, सञ्जयकुमार सिंह र सन्तुष्टकुमार बस्नेत रहेका छन् ।

उनीहरुको माघ १४ र १५ मा कार्ययोजना प्रस्तुतीकरण र अन्तर्वार्ता हुने मन्त्रालयले जनाएको छ । त्यसपछि तीन जनाको नाम नियुक्तिका लागि मन्त्रिपरिषदमा सिफारिस गरिने छ ।