Prabhu Insurance
stcnepal long ad
prabhu bank long ad

कुल १४ अर्बको हकप्रद शेयर बिक्रीका लागि नेपाल धितोपत्र बोर्डको अनुमति

civilbank long ad

काठमाडौं । चालु आर्थिक वर्षमा कुल १४ अर्ब चार करोड ९७ लाख सात हजार २५ रुपैयाँ बराबरको हकप्रद शेयर बिक्रीका लागि नेपाल धितोपत्र बोर्ड (सेबोन) ले अनुमति दिएको छ ।

बोर्डको विवरण अनुसार चालु आ.व.मा विभिन्न सात कम्पनीले हकप्रद शेयर बिक्रीका लागि अनुमति पाएका छन् । सबैभन्दा ठूलो परिमाणको हकप्रद शेयर भने हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेडको रहेको छ ।

नेपालको जलविद्युत् क्षेत्रको विकासका लागि स्थापना भएको यस कम्पनीले दर्जनभन्दा बढी आयोजनामा यसअघि नै लगानी गरिसकेको छ । कम्पनीको चुक्ता पुँजी २२ अर्ब रुपैयाँ पुर्‍याउने लक्ष्यका साथ एचईईडीसीले हकप्रद शेयर बिक्री गर्न लागेको हो ।

बोर्डले कम्पनीलाई ११ अर्ब रुपैयाँ बराबरको हकप्रद शेयर बिक्रीको अनुमति दिएको छ । अहिले ११ अर्ब रुपैयाँ बराबरको चुक्ता पुँजी भएको कम्पनीले हकप्रद शेयर बिक्री गरेपछि कुल पुँजी २२ अर्ब रुपैयाँ बराबर पुग्नेछ ।

कम्पनीले ७६२ मेगावाट क्षमताको तमोर जलाशयुक्त आयोजना र रोल्पामा आयोजनास्थल रहेको माडीखोला जलाशयुक्त आयोजनाको विस्तृत परियोजना प्रतिवेदन (डीपीआर) तयारी गरिरहेको छ ।
कम्पनीको शेयर बिक्री प्रबन्धकमा ग्लोबल आइएमई क्यापिटल लिमिटेड रहेको छ । बोर्डले असार ९ गते हकप्रद शेयर बिक्रीको अनुमति दिएको हो ।

यस्तै बोर्डले समृद्धि फाइनान्स कम्पनीलाई ३६ करोड ३९ लाख ६० हजार ६ सय रुपैयाँ बराबरको हकप्रद शेयर बिक्रीको अनुमति दिएको छ । नागरिक लगानी कोषले समेत चालु आवमा नै हकप्रद शेयर बिक्रीको अनुमति पाएको हो ।

कोषले १६ करोड ९७ लाख ५० हजार ६ सय २५ रुपैयाँ बराबरको हकप्रद शेयर बिक्रीको अनुमति पाएको हो ।

यसैगरी नारायणी डेभलपमेन्ट बैंकले एक अर्ब ३५ करोड ९२ लाख ५९ हजार दुई सय रुपैयाँ, अरुण भ्याली हाइड्रोपावर कम्पनीले ५२ करोड ४१ लाख १९ हजार सात सय रुपैयाँ र अपि पावर कम्पनीले ५६ करोड ७० लाख रुपैयाँ बराबरको हकप्रद शेयर बिक्रीको अनुमति पाएको हो ।

यस्तै बोर्डले चालु आवमा मात्रै २३ वटा बैंक तथा वित्तीय संस्थालाई २३ अर्ब चार करोड रुपैयाँ बराबरको ऋणपत्र बिक्रीका लागि अनुमति दिएको छ ।

बोर्डले पछिल्लो पटक मैलुङ खोला जलविद्युत् आयोजनालाई साधारण शेयर बिक्रीका लागि अनुमति दिएपछि चालु आवमा मात्रै कुल १९ कम्पनी पुगेका छन् । मैलुङ खोलाले सात करोड ३६ लाख २८ हजार रुपैयाँ बराबरको साधारण शेयर बिक्री गर्नेछ ।

बोर्डले कुल १४ अर्ब ४१ करोड ५९ लाख ५३ हजार सात सय रुपैयाँ बराबरको साधारण शेयर बिक्रीका लागि अनुमति प्रदान गरेको छ ।

बोर्डका अध्यक्ष भीष्मराज ढुङ्गानाले नेपालको धितोपत्रको विकास र विस्तारमा अत्यावश्यक रूपमा गरिने सबै कामलाई सहजीकरण गर्न बोर्ड प्रतिबद्ध रहेको बताउनुभएको छ ।

यस आधारमा पनि आउँदा दिन धितोपत्र बजारको विकास र विस्तारका लागि झनै सुगम बन्ने विश्वास गर्न सकिन्छ ।रासस


२६ असार २०७८, शनिवार १६:४७ बजे प्रकाशित

kathmandu gov long ad
nabilbank long ad