इजरायलको प्रधानमन्त्री बन्न लागेका बेन्जामिन नेतान्याहुले आगामी साता सपथ लिनेमा आफू आशावादी रहेको बताएका छन् ।

इजरायलमा नयाँ सरकार गठनको बाटो खुलेको छ र योसँगै बेन्जामिन नेतान्याहु कीर्तिमानी छैटौं पटक सत्तामा फर्किनेछन् ।

उनको गठबन्धन सरकारलाई कट्टरपन्थी यहूदी पार्टीहरू र अति(राष्ट्रवादी पार्टीहरूले समर्थन गरेका छन्। यो इजरायलको इतिहासमा सबैभन्दा दक्षिणपन्थी सरकार बन्ने विश्वास गरिएको छ।

गठबन्धनले यहूदी बस्ती विस्तार गर्ने र सुरक्षा बल र न्यायपालिकामाथि नियन्त्रण बलियो बनाउने योजना बनाएको छ।

‘द ज्युइश पार्टी’का नेता इटामार बेन गभिरलाई नयाँ सरकारमा राष्ट्रिय सुरक्षामन्त्री बनाइने भएको छ । उनी विगतमा जातीय भेदभावको अपराधमा दोषी ठहर भइसकेका छन् ।

गठबन्धनका साझेदारहरूले नेतन्याहू विरुद्ध चलिरहेको घुसखोरी र जालसाजीको मुद्दालाई अन्त्य गर्ने कानुनी सुधारहरू पनि प्रस्ताव गरेका छन्।